PJ嘴对嘴｜泰国曼谷豪住玩行程 入住全球第二酒店 私人露台坐拥湄公河景
发布时间：09:00 2026-10-28 HKT
结婚周年，同大家分享曼谷六日五夜之旅。设计行程呢啲粗重功夫当然系由老婆负责⋯⋯性格偏Chur的我，编了个完全唔嘥时间的豪住豪玩行程。
Ms. J：行程满满 浪漫满屋
今次下榻了两间酒店，2026年全球排名第二酒店——Capella服务好到加零一，酒店人流唔多，啱晒过二人世界。酒店房坐拥湄公河景色，每间房都有私人露台。房价每晚约$7,000，间中会推出Stay 2 Free 1 Night，见到的话真系唔好错过呀！
Ritz Carlton Bangkok位于Lumphini Park对面，无边际泳池系一大卖点，房间设备亦系顶级，有Dyson风筒同Frette浴袍。要特别一赞Ritz Club Lounge，服务一流，由朝到晚都有免费食物及饮品供应，每晚房价约$2,800起。
穿泰服影靓相已成指定动作，洁癖的Mr. P通常唔肯着租借衣服，但话晒庆祝结婚周年，佢先唔好意思拒绝……影完相返酒店冲凉，再打扮一番，启程去靓景天台餐厅Le Du Kaan睇日落同食饭。
行程内加插了两个下午茶。纯白唯美Author's Lounge位于文华东方酒店内，过百年历史的白色欧陆式建筑搭古典楼梯，下午茶以书本形式呈上。
Dior Gold House走金色奢华路线，网上订位记住要拣Glass House位置，影相会靓好多。
Mr. P：疯狂打卡任务完成
结婚15周年纪念之旅，对我嚟讲非常简单；行程不用问，只须全力配合最高管理层的决定便可！基本上，这趟打卡旅行，无论酒店设施抑或环境，都系靓到晕，绝冇冷场；冇冷场意思系我冇停过被召唤拍片影相……说好的放松同叉电呢？
晨早起身，早咗来到酒店，未有早餐食就要去Set头化妆拣泰服。喺烈日下影相，全身由内到外都湿透。一定要请摄影师，唔好悭呢笔钱，因为从此相片质素、主角影得高矮肥瘦唔再关你事，兄弟们，此刻无价！
Le Du Kaan日落OK靓，不过坐指定卡位最低消费每位$1,300！好彩阿J英明一口拒绝；唔好以为有靓景大晒先得㗎，啲食物真系好普通，名厨加持都搞唔掂……
Dior Gold House不设最低消费，斋叫饮品就畀你舒舒服服慢慢影相，Dior高明呀，先引你嚟然后大包细包走出门口……人出豉油你出鸡，大概就是这个意思吧。纵使阿J之后安排了三个钟的按摩给我，我叫按摩师唔需要落精油，落止血散吧！
----------
PJ Moments——以夫妻二人视觉去分享美食及旅游经历
