晨光追擊│「駿步騰飛」唞夠操足

晨操動態

更新時間：14:12 2025-02-15 HKT
發佈時間：16:00 2025-02-15 HKT

行船跑馬三分險，上周日沙田馬場不幸有墮馬事件發生，不幸中的大幸是四位騎師都只是受傷，未有生命危險。由於潘頓同何澤堯將會缺陣一段日子，一眾二線騎師將會大大受惠，好似艾道拿明日就手執多匹惡馬。

駿步騰飛全面爆發

「駿步騰飛」今仗更落番三班，唞夠操足，有力再贏一場。

第十場第三班一二○○米：「駿步騰飛」今季加盟游廄全面爆發，先於跑馬地千二米取得一冠一亞，近三戰角逐田草千二米再獲兩冠一殿，至今得三冠一亞一殿，合共加了二十六分，僅次於季內累加二十九分的「晨曦儷人」。

「駿步騰飛」前仗只以半乘力壓「喵喵怪」，而且同場幾匹對手意外倒下或收慢，但鞍上人麥道朗末段只拍打五鞭就奠定勝局，孭頂磅也贏來如此輕鬆，實在犀利。上仗「駿步騰飛」首度出戰二班賽，拍住「合夥奔馳」同到只輸半個馬位已算是有所交代，難怪跑第四也獲加分，可見深受評磅員重視。「駿步騰飛」不斷進步升勢強勁，今仗更落番三班，尚要唞夠操足，有力再贏一場。

有目共賞增程更好

「有目共賞」外地跑千六一戰即勝，增程必定更好。

第十一場第三班一六○○米：「有目共賞」來港前分別由韋紀力及戴文高贏過，尤其在戴文高胯下越打越有，可見馬匹相當受騎，也展現出極強鬥心。來港後「有目共賞」初出時狀態頂多六、七成，只跑第九名不算出色。接戰「有目共賞」再攻千四，名次大幅度提升跑第三，睇番片馬匹起步時慢了，巴度立即推騎搞到隻馬上口難操控，入到直路大半程又被「包裝福星」封了去路，之後又跟住「鈦易搵」，直至一百五米先至轉出外疊望空，如此情況下都追到第三，表現已算出色。

上仗改配麥道朗，發揮當然好得多，結果亦不負眾望開出熱W，更吸引是在閘前曾經重新釘甲，如此情況照贏相當少見，同時顯示極高質素，外地跑千六一戰即勝，增程必定更好。

兆文

↓立即下載星島頭條App↓