晨光追擊│ 「龍騰飛翔」狀態勇銳

晨操動態

更新時間：16:33 2023-11-24 HKT
發佈時間：16:33 2023-11-24 HKT

由於大多參戰馬已進行試跑，今朝僅得八匹周日參戰分子出跳，因此講番昨晨出跳馬予大家參考。

「九五赤兔」助手跳一段，戴鼻箍，聚精會神走勢爽夾勁，馬身好靚好壯，毛色油潤悅目，狀態已去番最佳時候。「龍騰飛翔」助手跳兩段，此駒狀態弗唔弗好易睇，唔弗的話走勢甚平淡，弗的話就好肯走，今課見其試得起勁，此乃狀態勇銳之表現。

「朗朗乾坤」田泰安跳兩段，按住輕鬆完成唔急唔搶，落腳輕快有彈力，馬身收得結實，成熟程度再進一步。「撼天鐵翼」戴頭罩由助手跳兩段，灰馬毛色深潤好睇，馬身收得結實展現線條美，落腳輕快予人好感。

「競駿天下」戴眼罩及頭罩由助手跳一段，一貫頭岳岳，論態仍在爭勝水準，馬身收得夠壯唔瘦，出腳輕快有彈力。「神魔金剛」賀銘年跳兩段，仍有點分心，不過外觀好靚，展步亦見順暢，觀感勝前。「天天得樂」賀銘年跳兩段，忠心馬唔會跳得差，不過差點氣勢火氣一般，仲要毛色都有點淡。「精益大師」戴頭罩由助手跳兩段，依舊重口人馬角力，外觀亦好普通，進步不大。「瀧澤飛駒」戴頭罩由希威森跳兩段，口勁無咁重，開始接受操控，然而落腳仍重欠利落，有待磨練。

至於周四出跳馬方面。「越駿歡欣」戴頭罩由助手跳兩段，神情專注快慢由人，馬身好靚，狀態弗到不得了。「包裝伯樂」艾兆禮跳兩段，外觀靚唔在講，更放鬆更淡定，勇熟俱進。「愛馬善」助手跳兩段，試來氣宇軒昂步爽力勁。「魅影獵飛」助手跳兩段，昂首闊步充滿勁度，馬身收得好靚，朝氣勃勃。

兆文

立即下載 | 全新《星島頭條》APP : https://bit.ly/3yLrgYZ