晨光追擊│ 「迎樂」「話你知」今晚掂

更新時間：15:46 2023-11-14
發佈時間：15:46 2023-11-14

剛戰潘頓食出大四喜，但策騎「金駿星」又有驚喜演出，全程居然一步未騎過，最初以為隻馬健康有事，殊不知賽後並未驗出任何問題，更抵死係潘頓表示：「在港初出的坐騎從今仗中獲益」，競賽小組竟然讓佢順利過關！

第四場第四班一二○○米。「迎樂」初出跑谷草已票數硬淨，之後田草連敗三仗，上季尾二一戰回師同程終於上名，接戰更進一步熱捧補中。今季「迎樂」首戰排檔好分頭唔錯，全因希威森走去跑「高份數」，結果「迎樂」易配楊明綸照樣添食，又一次僅勝短頭位看似驚險，實則接連以短距離勝出，次次鬥贏對手非比等閒。

講開又講，「迎樂」乃一匹好奇怪的馬，晨課表現漫不經意，近兩個月更超級懶散，上仗賽前試閘唔肯走，埋門再彈閘又被廄侶拋離，然而落到場卻亢奮無比，乃典型詐傻扮懵之馬，在晨課識得留力，留待落場全力盡拼。再看近兩戰「迎樂」排外檔，次次走外疊依然所負不遠，不斷進步之馬今置身弱組，且跑法佔優值得看好。

「迎樂」不斷進步之馬今置身弱組，跑法佔優值得看好。

第九場第三班一六五○米。「話你知」上季只上陣三次，三仗均角逐千四，首戰拼後曾休息近五個月，之後復出排大外檔依然票數硬淨，最終以強橫後勁追入季軍。去到煞科戰，縱使「話你知」出閘唔快全程在後，但入直路輕鬆一攻而破，造出廿三秒廿六全場最快時間，贏馬姿態極佳。

「話你知」今季首次賽事即派上陣，之前千二都未跑過突然去跑直路賽，仲要用黃智弘兼賽前無做閘，事後睇番根本全為熱身。上仗跑番千四用何澤堯，就算遇上慢步速兼去到三百米才望空，一樣後上奪冠相當犀利。方嘉柏今次安排「話你知」跑今晚谷草一哩，看來是遷就何澤堯復出，加上認定此馬有氣量，再看早於六月三日試過谷閘已仄準，轉場必定有計。