星級大搜查丨明星自認初級定高級大人?周嘉洛自爆學識洗衫 姚子羚盛讚視后「超高級」
發佈時間:08:00 2026-11-16 HKT
踏入社會職場,表面上光鮮亮麗的藝人們到底自理能力如何?是獨當一面的「高級大人」,還是私底下論盡的大細路「初級大人」?今集《星級大搜查》就訪問到多位明星,自評是「初級大人」還是「高級大人」。不少藝人自認生活技能欠奉,更自嘲是「生活白痴」。已過而立之年的周嘉洛透露,兩年前才學懂用洗衣機洗衫,李佳芯更自揭經常忘記交電費慘遭Cut電!
周嘉洛兩年前學識洗衫 李佳芯冇記性被Cut電
談到日常生活自理,多位當紅小生花旦紛紛直認私下是「初級大人」。周嘉洛自嘲工作雖然認真專注,但私底下絕對是生活白痴:「生活細節上好多都……洗衫都係最近學識嘅,啊,我諗都學識咗兩年左右啦。嗰啲呀嘛,即係邊一個洗衣粉嗰啲,柔順劑要落邊格嗰啲。其實最好就唔好用柔順劑啦,因為會破壞入面嗰啲纖維。」他笑指全因到外地拍劇才被逼學識洗衫,但最緊要「學得快」。女神李佳芯同樣自評一個人時絕對是初級大人:「我係咩都會唔記得啦,又大頭蝦啦,又冇 planning 啦,又唔識照顧自己啦,跟住又會成日唔記得交電費俾人 cut 電嗰啲人嚟嘅。所以身邊啲朋友都會話我好Kam嘅。」不過她笑言一返工就會釋放高級大人一面,扮到好精神。王菲亦自爆成日大唔透:「即係可能早幾年我都會話『大人唔喺屋企』。即係廿幾歲都仲講緊『大人唔喺屋企』,但係其實我已經係一個大人嘅狀態。」姚子羚則坦言自己買機票極度愚鈍:「初級係……我其實我唔係好識得去買機票嗰啲囉。即是人哋依家係會上網買機票啦,咁跟住你仲會格晒價啦……我係喺呢方面我是好……好 stupid 嘅。水費電費有時我都會唔記得繳交嘅。」劉漪琳亦自嘲是渴望成為高級大人的初級大人:「明明講緊電話,但就搵緊個電話喺邊,同埋好容易認不得路。」
相關閱讀:星級大搜查丨明星育兒血淚史!謝安琪仔餐廳掟檸檬 洪永城狂奔半個鐘捉女 郭羨妮當街鬧女
阮嘉敏自薦做鐘點工大騷超強自理能力
相反,部分藝人則展現出極強的獨立生存能力,絕對配得上「高級大人」稱號。阮嘉敏自封生活達人,更自爆私下是收納狂熱者:「我除咗唔係好識煮飯,即係我唔係好叻之外呢,家頭細務我真係可以去做鐘點工囉!我好鍾意執屋㗎,會幫你執到好整齊啦。經濟方面我自己都係有獨立嘅經濟能力,生活上基本上我係可以自己解決晒所有嘢囉!」何沛珈則坦言為了做妹妹的榜樣,自小就強逼自己變得堅強:「就算我係初級大人,我覺得我都係飾演一個高級大人,因為我仲有妹妹,妹妹要睇住我作為榜樣。高級大人其實係內心可能收埋咗好多嘢,之後但係佢表達出嚟,永遠都係一個好開心、好活潑嘅人。」男團 MIRROR 成員邱士縉(Stanley)亦自信表示能兼顧所有生活瑣事:「我可以照顧到自己,同埋照顧到另一半嘅人。我可以填滿自己啲空閒時間,好鍾意一個人去茶餐廳食嘢、睇戲打波。」孫慧雪自評從小獨立自主:「揀小學、揀中學都係我自己揀,好誇張!我老公覺得我喺工作上面嗰個獨立係爆分嘅,但一唔返工好似冇咗個腦咁樣嘅,食嘢都好似唔識自己去食咁樣。」陳曉華則自封「自由嘅高級大人」:「我嘅凌亂啦、我嘅一塌糊塗呢,其實都係照顧緊自己。我喺呢啲凌亂同埋一塌糊塗之中呢搵到快樂出嚟!我搵路係超叻㗎,我睇地圖係好有一手!」
相關閱讀:星級大搜查丨娛圈多騙案苦主?何沛珈被呃手袋怕失禮唔「報東張」 郭柏妍自爆被騙感情
陳家樂被連詩雅軟性引導戒打機
除了單身藝人的生活模式,已婚及為人父母的藝人更在家庭育兒路上體會到高級與初級的差別。陳家樂坦言自評實質上仍是初級大人,更大讚太太連詩雅是引導型高級大人:「我太太係高級大人,我係初級大人。佢會話咗畀我聽個結果係噉樣,去引導我。即是我打機,打機個結果就是個女會唔同我講嘢,因為我顧住打機唔陪個BB嘛。噉陳太就會講:『嗱,你睇下,你個女今日開始唔理你喇,你知道點解啦。』噉我就會放低部機去同我個女玩。」已經為人母的湯怡直言面對五歲女兒時每日都是挑戰:「每日都是面對緊不同的問題同埋挑戰,依家小朋友五歲,最多『點解呀?媽咪點解?』,你要搵個方法同佢解釋,對我而言是非常之大的挑戰。」她更甜讚老公麥秋成是高級大人:「訓練個女分房瞓,同我傾就點都唔得,老公話『等我同佢傾一傾啦』,過咗個下晝搞掂咗喇!佢女會自己分房瞓喇!」另外,身為人父的陳湛文則自評為中高級大人:「屋企大大小小需要安裝嘅嘢都係我負責嘅。除咗同個女玩嗰時我先至會扮三歲小朋友,其餘時候我都要做返一個真係大人要做嘅嘢。」黃淑蔓則自稱中級大人:「高級大人可以自己處理任何難題同經濟壓力,初級大人又保留咗小朋友初心,鍾意黐家同買公仔,我覺得自己兩樣都有。」阮浩棕同樣自評介乎中間:「未係一個好自立嘅人,但心態上已經無咗細個嗰種銳利,所以中級啦。」馬貫東則笑稱要視乎場合:「寵物店因為有豐富經驗partner,佢做高級得㗎喇;但喺屋企我要照顧貓同所有嘢,無得唔做高級大人。」
相關閱讀:星級大搜查丨伴侶難頂習慣大揭秘!羅子溢拖延症激死楊茜堯? Stanley嫌未婚妻行動力太高
姚子羚盛讚視后胡杏兒落單極果斷
訪問最後少不了圈中好友互相大踢爆!姚子羚毫不猶豫點名胡杏兒是心目中的頂級大Boss:「一定是胡杏兒!她是非常果斷啦,同埋她所有嘢基本上自己絕對可以 handle 晒嘅。果斷到我們一班人出去食飯呢,有時我有選擇困難症,她打開個菜單:『得喇。呢個、呢個、呢個……』好果斷叫一堆餸出嚟安排晒!好 leader,生活之中她一定係高級大人!」何啟華(阿Dee)則笑言生活上賬單經常罰息,是個初級大人,更爆料隊友 193(郭嘉駿)比自己更大鑊:「三爺點解叫三爺呀?三少爺呀!少爺係唔需要自己做嘢㗎!買車佢好叻,但填表嗰啲呢佢都係『搵人搞啦喂』,嗰啲洗衫呢『哎呀搵個工人整啦』,佢唔會自己洗衫!」阿Dee同時力讚王智德(Alton)生活有條理兼會自己填表,絕對是高級大人。王菲則笑指陳熙蕊是「低級大人」:「佢係一個極度需要人照顧嘅女仔,好少事都要你幫佢做選擇同決定。」周嘉洛盛讚朱敏瀚方向感極強兼睇一次地圖就識帶路,非常有型,但亦自豪自己帶錯路夠 Spontaneous(即興):「行錯方向無問題,先可以欣賞到意想不到嘅沿途風光!」李佳芯則發掘到呂爵安(Edan)極具童真初級一面;何沛珈大讚阮嘉敏感情事業清醒獨立;孫慧雪點名林秀怡照顧父母堅強獨立;陳家樂則大讚衛詩雅廿歲出頭就考定多個專業牌照規劃人生;陳湛文認為阿Dee思維高級但行徑中級;馬貫東則笑指陳曉華解決問題能力強到「黐線」,可見於娛樂圈中,無論是自力更生的「高級大人」,還是隨性可愛的「初級大人」,都各具獨特生存之道。
相關閱讀:星級大搜查丨明星通訊習慣大公開 Ian疑有電話恐懼症:有人打嚟我就好緊張 陳瀅最憎人打電話

















