「的士大王」鄭克和：政府「一年拖一年」未禁白牌車 料循法律挑戰 不排除罷駛
發佈時間：10:13 2025-05-08 HKT
有「的士大王」之稱的的士車行車主協會永遠榮譽會長兼主席鄭克和向特首發信，要求當局嚴打網約白牌車、說明立法方向，否則採取「進一步行動」。鄭克和今早（8日）在商台節目表示，政府「乜都話做緊嘢」，但實情是白牌車越做越猖狂，業界面對極不公平競爭環境。具體行動方面，目前傾向法律訴訟，但也不會排除罷駛等較激烈方式，強調不想用對抗方式，和平解決一定是優先選項。
的士︱鄭：業界等足政府11年
鄭克和指，自Uber白牌車在香港營運至今，「業界忍咗佢11年」，政府經常說會改善問題、改法例，但這11年「業界從來都無停過等佢，要做車隊，我哋都即刻做，好加把力咁去做。咁白牌Uber應該趕佢走啦？點知未走之前，高德（白牌車服務）又來，咁點呢？滴滴（出行）嚟嗰陣，佢話係做（網約）的士，咁我哋業界實歡迎，最緊要你合法。結果佢出埋廣告招乘客，搵白牌私家車加入。」他形容是一波未平一波又起，令整個行業震盪。
相關新聞：
市區的士牌價暴跌至240萬 「的士大王」函特首要求嚴打白牌車 否則採「進一步行動」
大棋盤︱「的士大王」發難 涉業內一個深層恐懼 分析：業界已如同「待宰羔羊」
的士︱形容業界「正面臨最危急時間」
鄭克和指一直有和政府溝通，希望後者可清晰告訴業界，不合法白牌車如何處理，但政府沒什麼回應。「我哋好多車主都係想退休買個牌返嚟收租，晚年過好啲。點知（牌價）七百幾萬跌到𠵱家二百萬。」形容現時牌價已達歷史新低。他續指：「我哋係1994年，一百七十幾萬同你買個牌返嚟、2015年大嶼山的士牌，六百幾萬同你買返嚟。」結果白牌車幾乎零成本，就可以做和的士一樣的生意。「我哋買個車保都六、七萬，佢哋就幾千蚊就得。三兩萬蚊買架二手私家車，就載得客。」
他強調，實在不想搞亂社會或整個行業，但政府確實沒有回應業界的訴求，「乜都話做緊，一年拖一年，無咩動態可言，搞到投資者又驚慌，司機都成日打嚟，話周街都係Uber呀，機場同高鐵站周圍都係，對我哋合法經營者好唔公平。」
鄭克和指政府聲稱年尾提出立法框架，然而年底是立法會選舉，「到時又推幾多年？」形容現時行業正面臨最危急的時間，長此下去牌照隨時要「俾返銀行、俾返政府」。他指政府經常說「做緊嘢」，其實只是「嘈一嘈就拉兩架（白牌車）」，但同時又要掃蕩合法的士，「話玻璃有危險，又捉幾架。兩者同一時間做，到底係做俾我哋睇，定係做比Uber睇？」種種狀況令業界非常憤怒、忍無可忍。
被問到採取「進一步行動」是指什麼，鄭克和指可能會涉及法律訴訟，挑戰政府目前對白牌車的取態，已經徵詢法律意見，有一定根據，但強調「咁做都好傷，唔想見到去到呢個田地」。至於是否考慮罷駛，鄭克和指「唔會排除呢樣嘢，但具體要等政府回應」，同樣不希望要用這類手法，和平解決一定是優先選項。
具體訴求方面，鄭克和指業界最核心的不滿是不公平競爭環境，「一個唔使成本（的士），一個天價（白牌車）」，政府一定要及早交代如何處理，讓業界安心。主持人問到是否「你哋有嘅（營運條件、限制），佢哋（網約私家車）都應該有；佢哋冇嘅，你哋都應該冇」，鄭克和同意。
