晨光追擊│ 「嘉應喝彩」進度出色

更新時間：16:06 2023-09-30 HKT
發佈時間：16:06 2023-09-30 HKT

第四場第四班一二○○米：「嘉應喝彩」上季已試三課閘，今季再試多三課，三課全部高速放到，可說是準備就緒。此駒今季首課閘以清風送爽姿態勝出，跑出時間是當日五組中第二快，更吸引該日每組頭馬場場勁揪，除了第六組仍未出賽的「同滿滿」，另外四組頭馬「自強不息」、「能文能武」、「贏科超影」及「順勢而飛」，全部之後出賽不勝有位。

「嘉應喝彩」第二課閘同樣贏得出色，然而講到吸引程度，必數第三課，因為強如「加州星球」都畀佢揮低，縱使末段要騎，但力度不算太大。最誇張的是「嘉應喝彩」全程拍住「加州星球」未有卻步前後兼備，除了進度出色，亦展現非一般鬥心。

第十場第三班一四○○米：一早已留意「馬林」，除了生得好大隻，首戰體重高達一三三四磅，而且落地無耐韋達一再親操，但一如晨課及試閘，每次上陣都周身脾氣，相對地仍有不足之下，上季能交出一冠兩亞佳績，足以顯示質素之高。

今季「馬林」未致於變得好乖，不過起碼上仗去到閘前無再發癲，縱使陣上繼續搶口，但孭住頂磅照贏相當犀利。更吸引的是此駒跑出一分廿二秒七二，時間仲快過當日三班頭馬「能文能武」，甚至比起贏二班的「中華盛景」一分廿二秒四五只慢少少，再睇番「中華盛景」在上周三級賽入位，可見「馬林」升上三班絕對不會落於下風。

兆文

立即下載 | 全新《星島頭條》APP : https://bit.ly/3yLrgYZ