物業投資者減價賣樓棄車保帥｜湯文亮

樓市動向

更新時間：17:28 2024-07-29 HKT
發佈時間：17:28 2024-07-29 HKT

近日有不少物業投資者減價出售物業，部分更加要蝕讓，亦有一些是優質物業，按正常情況，投資者是不會出售，現在是否睇唔好後市，投資者才會減價賣樓。

投資者對銀行不寄厚望

就算投資者睇好樓市都冇用，面對銀行「便秘」，有入冇出的情況下，即是call loan與唔放數，以及利息上升，租客仍未復原，租金收入減少，最直接方法是賣走手上一些物業，以現在時勢，唔係優質物業都很難賣得走。

物業投資者唯有棄車保帥，將手上最優質的，甚至是自用或者自住的物業賣走，希望可以渡過難關。

現在物業投資者對銀行都不敢寄予厚望，唔好話借錢俾人買樓，唔call loan已經是功德無量，而且大家都有一個感覺，銀行是不會在短期內回復正常，銀行唔放貸，投資者就要自尋出路。

留得青山在那怕冇柴燒

雖然賣走一些非常優質的物業是很悲傷，但總好過被銀行沒收手上物業，如果銀行以銀主身份出售投資者物業，樓價更加慘不忍睹，甚至賣完仍然被銀行call loan，所以，不如以棄車保帥所持的心態是由自己賣，樓價一定會比銀行揸fit賣好得多，棄車保帥是沒有辦法中的辦法，目的是生存，正所謂：「留得青山在，那怕冇柴燒」。

湯文亮

紀惠集團副主席及行政總裁

↓立即下載星島頭條App↓