切勿胡亂投資餐館︳曾智華
發佈時間：10:18 2026-10-19 HKT
社交場合，經常聽到有人揶揄剎那間致富者——有錢就任性，有錢就身痕。上句多指亂買野或亂搞男女關係，下句則多是形容亂咁投資。
事實上，就我多年觀察，香港人十之八九非常熱衷各種各樣的投資，例如物業、股票、期貨、黃金、基金、外幣等，雖然十之七八蝕本收場，但個個熱情不減，前仆後繼，永不言棄。
另外，也有接近一半心思思想做生意，純因誤會生意與賺錢有個等號（當然唔係！），而當中起碼有一半目標是搞飲食，尤其是藝人。
小弟親身所見，10個藝人投資生意，8個會做飲食業，結果是7個蝕大本收場，大家可上網查證。
藝人做飲食蝕本案例多
點解？古語有云：不熟不做。你識做戲唱歌，唔代表識做飲食業，交學費都交死你。
昨晚與一名醫P晚飯，講講吓，講到「人生理想」。原來佢現今最高理想，並非醫好病人，而是搞一間成功的菜館。
「碌Sir，我識得大把醫生同業，個個愛飲愛食，使得起錢。如今街舖市道低迷，處處平租，相信此乃最佳創業時機，若能搵到間執笠餐館，有牌有設備，樓面執執就可開業，立時有現金收入，撳地游水，博得過。掂的話，我計劃開多三五間，再做埋外判經營權，然後搞上市……」
以上呢番說話，多年來我聽過N次，次次都似「發夢王」在講心聲，結果如何？未見過一位成功！
因個個發夢時，只幻想美好一面，而不知行行皆充滿蛇蟲鼠蟻及醜陋現象，未摸清楚就衝入去，唔俾人玩殘榨乾就奇。
「P哥，你乃『月球』名醫（月月百萬收入），單靠開刀已經財源滾滾來。對，手術你高晒，但騙術，你識乜吖！矇查查開間菜館，你可知由搵舖到裝修到申請牌到請廚房樓面再到入貨，全部都會有人呃你？點呃法你知唔知？就算順利開到，樓面廚師辰時卯時跳草裙舞話唔撈時你識唔識處理？打開門做生意，江湖人士上門「幫襯」，你識應付？重有，晚上塞油渠糞渠停電……點搞？」
P哥聽到成頭汗，望佢「投資夢」醒啦。
香港人十之八九非常熱衷各種各樣的投資，雖然十之七八蝕本收場，但個個熱情不減，前仆後繼，永不言棄。
資深傳媒人 曾智華
