黃日華喪妻後鑽牛角尖：分分鐘跟佢去埋 含淚感激苗僑偉「拯救」
發佈時間：21:00 2025-06-26 HKT
1996年港姐「四料冠軍」兼1997年國際華裔小姐亞軍李珊珊當年御任後加入TVB並曾拍攝《烈火雄心》、《撻出愛火花》、《鑑證實錄》等劇集，其後再轉戰電影，不過在2005年開始減產，神隱期間一度傳出患腦癌及抑鬱消息，直至2019年，李珊珊為精神健康基金會拍攝短片，分享患上驚恐症及治療期間過程，指自己於2017年出現發熱、冒冷汗及呼吸困難等症狀，感到身處瀕死邊緣。
李珊珊黃日華相隔多年再合體
曾經每日徘徊地獄又折返人間的李珊珊積極面對病情，成功戰勝情緒病後復出轉型做YouTuber，創辦《 三坐山 Mount Trio》YouTube頻道，在昨晚（25日）播出的一集，找來偶像黃日華做嘉賓，原來今次是李珊珊和黃日華相隔多年再合體，黃日華說：「我哋好多年冇聯女絡，早幾年仲好擔心妳，身邊啲朋友個個冇你嘅消息，而家出返嚟，真係好開心。」
相關閱讀：90年代「傳奇女星」驚爆慘痛經歷 被變態男伸出X頭非禮：嚇到魂魄唔齊
黃日華為太太完成後事終「爆煲」
黃日華太太梁潔華於2020年不幸因病離世，遺下兩父女相依為命。喪妻之後未有再接拍電影及電視劇，黃日華回想當日照顧太太，他說：「嗰陣唔會諗咁多嘢，全心全意照顧太太，乜嘢朋友都唔見，一起身就去醫院，乜都以佢為先。」李珊珊大讚黃日華是好男人，黃日華說：「咁佢始終係我老婆，係自己揀返嚟，一定要愛錫佢，有乜事都要面對現實，唔會放棄。去到最尾嗰幾日，我知係乜嘢結果，但係都要接受。」太太的喪禮完成後，黃日華終於「爆煲」：「嗰陣一個人喺間房，開始會諗返轉頭，點解個天要咁樣對我，唔畀我有一個好結局，佢曾經講過想退休之後，我哋孭住個背囊去環遊世界，點解我做唔到？我都算係好人，點解會有咁嘅結局。」
黃日華憶述喪妻後心情流下男兒淚
黃日華曾表示看到太太患病時很心痛：「我成日同個天講，祢畀佢好返，就算我知10、20年命都冇所謂，可惜始終都改變唔到。」經歷過一段胡思亂想的日子，黃日華說：「嗰陣三哥keep住搵我，成日叫我出去飲茶，佢將我喺個低谷拉返出嚟，真係好多謝佢。」黃日華亦忍不住流下男兒淚：「佢兩公婆真係好關心我，而家再諗返轉頭，會覺得事情都發生咗，結局擺咗喺你面前，點都要承受，慢慢執返好佢，唔開心一定有，但係盡量忘記以前啲嘢，我仲要照顧女同佢嘅屋企人，如果得我一個就好危險，分分鐘跟佢去埋。」不過因為太太的離去，黃日華決定不再拍戲：「佢係我頭號fans，每次佢睇完會畀意見，因為佢分析力好強，我先有進步。自從佢走咗，睇唔到我做戲，咁我仲做嚟做咩？而且我本身唔係咁鍾意做呢行，加上經濟唔算有壓力，咪當休息下。」
相關閱讀：「傳奇港姐」嫌錢腥拒愛？自爆曾獲富商送逾3千萬豪宅兼任揀Benz 連介紹人都有6位數
黃芷晴由藝人轉型幕後：
黃日華曾為演出而「剪脷根」
黃日華自從為羅敏莊的直播擔任嘉賓後，本來不打算再做，不過今次因為李珊珊而再出山，二人一見面便互相擁抱，黃日華笑說：「我等咗好耐，個個都上咗嚟，點解仲未到我。」李珊珊亦稱神隱期間收過黃日華鼓勵：「你叫我係時候行出嚟，唔好收埋自己，我真係好多謝你。」黃日華入行多年，曾有傳他為了演出而「剪脷根」，黃日華說：「嗰陣訓練班實習要捱夜，人又唔夠瞓，講嘢又唔字正腔圓，試過畀導演開咪鬧，有一日放假經過醫務所，人哋話我『黐脷筋』，反正我又冇嘢做，咪去搵醫生剪咗佢。」黃日華續說：「嗰陣又唔好痛，不過我覺得幫助唔大，反而聽老師講，慢慢讀好啲劇本，再加上經驗多咗，對自己壓力冇咁大，自然信大大咗，講嘢就好啲。」
防止自殺求助熱線：
「情緒通」精神健康支援熱線：18111
香港撒瑪利亞防止自殺會： 2389 2222
生命熱線： 2382 0000
明愛向晴軒： 18288
社會福利署： 2343 2255
撒瑪利亞會熱線(多種語言)： 2896 0000
東華三院芷若園： 18281
醫管局精神健康專線： 2466 7350
賽馬會青少年情緒健康網上支援平台「Open 噏」：http://www.openup.hk
