女神配對計劃丨姜卓文突轉軚李芷晴臨門一腳慘食檸檬 「吳卓羲2.0」因一夜情被梁敏巧轟講大話
發佈時間：15:00 2025-06-07 HKT
TVB戀愛綜藝真人騷《女神配對計劃》上周日（1日）率先曝光了16名男士的面試片段，節目出街後，一度在網上掀起熱話，當中最備受注目的，絕對是有「再版林敏驄」之稱的王維燁，除了「東芫和廣州」異地戀外，「髮型論」同樣叫人拍案叫絕，連節目中的兩位女神似乎對王維燁情有獨鍾，葉蒨文說：「其實咁守得秘密，呢啲做朋友一流！」梁敏巧更直言：「可唔可以叫佢返嚟，我想同佢瘋狂傾偈。」
五大女神拋開矜持為猛男瘋狂
《女神配對計劃》為五大女神梁敏巧（Maggie）、葉蒨文（Sophie）、李芷晴（Stephanie）、關嘉敏（Carman）及羅毓儀（Yuki）公開招親搵男友，在明晚（8日）首集現身的候選猛男絕對可以「人材輩出」形容，除有「爆肌版張敬軒」、港隊運動員、離奇富二代、型爆星二代及藝人，還有身家過億的霸道總裁；五大女神亦會拋開矜持一面，與候選猛男埋身接觸拖手仔甚至摸胸！
相關閱讀：女神配對計劃丨騎呢男逐個睇 「青筋波猛男」逼阿Bob啜嘢 《中3》落選者答嘢九唔搭八
女神配對計劃丨候選猛男「人材輩出」：
李芷晴言自覺是「戀愛腦」
在第一集「初見」篇，將會公開五大女神的拍拖次數及單身時間，五人之中，拍拖次數最多的是李芷晴，單身時間約半年左右的她，總共拍了六次拖，李芷晴言自覺是「戀愛腦」：「我覺得自己比較黐身啲、嗲啲，我好鍾意戀愛嘅感覺。」單身時間最長的，則為已有三年沒有拍拖的關嘉敏，扮譚輝智扮到街知巷聞的她，笑言希望能找到令自己重拾「做女仔」感覺的另一半。談到參加節目目的，揚言鍾愛「霸道總裁」的梁敏巧，希望可以「搵到老公」，至於葉蒨文則大拋自信Bite：「我冇試過暗戀人，我每次鍾意嗰個男仔，佢都會鍾意我。」
姜大衞兒子姜卓文強勢登場
在海選時搶盡人氣的姜大衞兒子姜卓文（細John）在第一集強勢登場，拋出自信霸氣bite：「我相信無論邊個揀我都好，我哋都會玩得好開心」之餘，還即場以流利普通話及英語爆Rap，令現場女神嘩聲四起！而一早擺明車馬力追李芷晴的姜卓文，亦成功冧掂李芷晴，李芷晴放下矜持連環大拋「少女bite」：「我心跳得好快」、「我係比較慢熱嘅人，可能你要lead住我喇」；雖然李芷晴無限心心眼，但姜卓文臨門一腳轉移目標改追另一位女神，並大嘆追李芷晴「好大壓力」！自爆曾拍了400次拖的「吳卓羲2.0」於首集亦有登場，不過「吳卓羲2.0」改口風稱只拍過大約50次拖，不過依然承認自己試過一夜情，但結果仍然被一眾女神為之卻步，事後林盛斌在女神們面前篤爆他「第一次面試時係話400」，原本已大為嘩然的女神們即表現得更錯愕，梁敏巧更忍不住負評：「50已經夠衰，仲要400，仲要講大話！」
相關閱讀：女神配對計劃丨「一陽指奇人」林偉麟是網絡界紅人 曾自稱「學霸」現身配對節目 被爆A0避談是否處男
《女神配對計劃》首集參賽者逐個睇？
森美反晒白眼笑羅毓儀「扭擰女」
每集都有不同組合花生團現身，首集花生團成員有森美、江美儀及戴祖儀，食足全程花生的三人，除對每位候選人評頭品足，又大談戀愛經，其中江美儀問森美「男仔鍾意主動定唔主動女仔」時，森美竟無厘頭搵羅毓儀做例子，搞笑尖聲扮「扭擰」之餘，還七情上面、反晒白眼：「梗係主動嘅女仔啦，唔使煩、唔使估、唔使諗。如果表面上好似羅毓儀嗰啲擘大對眼，（開始扮聲）：『我唔知道呀，你話喇』，但去到最後你話完畀佢聽，佢就：（再扮聲）『我又唔鍾意喎』，好麻煩！」
《女神》將一連兩集揭開入圍猛男神秘面紗
另一方面，《女神》將一連兩集揭開30名入圍猛男的神秘面紗，林盛斌讀出每位參賽者的職業、專長、個人hashtag等基本資料，之後參賽者會進行簡而精的自我介紹，有興趣的女神可向參賽者自由發問問題，並透過撳燈揀選心儀男士進行下一輪「約會配對」，每位女神心儀男士上限為三個。不過女神未有撳「心動按燈」前，製作組將不會公開參賽者真面目；直到有女神撳燈，參賽者面前的「粉紅帳幕」才會打開，女神見到真身後，可隨時熄掉枱上的燈打退堂鼓，其他女神則可在限時內加入「爭仔」。
