星級大搜查丨明星手機充電習慣曝真個性？郭柏妍一習慣顯焦慮個性 張振朗「借電」為生
發佈時間：08:00 2025-05-06 HKT
都市人越來越依賴智能手機，手機電量是否充足自然是一眾市民每日最關注的事。藝人明星同樣，甚至比一般市民更長時間使用手機。今集《星級大搜查》搜查一吓明星的手機充電習慣，並找來香港資訊科技商會榮譽會長方保僑，分享保養手機鋰電池方法。
王敏奕手機長期「見紅」
《星級大搜查》訪問多位藝人，發現不同人對於「跌到幾多%電量先叉電」都有不同看法。王敏奕說：「我成日唔充電，我有聽過充住電嘅電話唔可以攞喺手，會通到電流，對人體冇咁好。我平時臨瞓前如果撳電話，我就唔再充電，咁我撳到想瞓就瞓，第二朝又冇乜電……唔低過10%我都唔會開始心急。」王敏奕估計手機經常連着藍芽以及觀看影片恐是電量快速流失的原因。
相關閱讀：星級大搜查丨明星人生座右銘反映真實個性？金馬影后鍾雪瑩：唔死乜都得 劉德華「五字真言」成金句
劉佩玥、郭柏妍對「冇電」感焦慮
而劉佩玥向《星級大搜查》分享，她會在手機電量剩30%電量時才充電，她說：「我手機好少到佢出現紅色我先至充，因為我會好緊張，唔會充過夜囉！」劉穎鏇表示：「會用到一半就會忍唔住去充電，因為我成日好冇安全感，見到個電量一路跌落去，好驚唔充電個電話就會死。」而郭柏妍更表示：「手機冇電係好大件事！」因此她出門帶定三個「尿袋」，以防手機「冇電」。
林寶玉憂充電同時用手機會爆炸
朱敏瀚、張振朗和林寶玉同樣會在手機電池耗盡才充電，林寶玉認為這樣對鋰電池更健康，「應該用晒佢，跟住重新叉過，所以我得返3%電量就差唔多喇！」她對《星級大搜查》表示不會一邊充電一邊使用手機，「唔敢，因為我怕會爆炸，爆到我美貌如花嘅樣，哈哈哈……講笑！」林寶玉認為平時常用的IG及WhatsApp可能都是引致電量快速流失的手機應用程式，「因為WhatsApp成日都用，IG成日都睇。」
相關閱讀：星級大搜查丨包包掛公仔成娛圈潮流指標 湯寶如爆男藝人儲公仔成狂：車埋衫畀公仔著
男星懶帶袋「借電」為生
明星不時要長時間工作，但原來並非人人都會「盡責」帶外置充電器。朱敏瀚及張振朗向《星級大搜查》透露，平常習慣借用他人的外置充電器，朱敏瀚表示：「因為我好鍾意兩手空空咁出街，我唔鍾意帶袋，所以Power bank我都唔會帶，如果我真係需要充電，會問朋友攞充電器囉！」張振朗指：「我唔係預我今日會冇電，一定要帶好多個叉電器出去，我都係一個鍾意見步行步嘅人嚟，如果我冇電咪走去搵人充。」
女星普遍帶「尿袋」外出
郭柏妍因常被借用外置充電器，於是常備三個外置充電器。她說：「我無時無刻都會充，80%我都會充，因為啲電突然一跌落嚟，對於我嚟講冇晒電係非常大件事，因為我好多嘢都依賴咗手機，啲應用程式IG、小紅書、抖音……都會用到手機。因為我長時間需要充電，所以我係帶三個Power bank出街，一個for啲人問我借，借完之後我又冇得充……所以有個係for我自己用，仲有一個備用，for我第二嚿唔記得充嘅時候有第三個用。所以我個袋就好重，無時無刻都拎住咁多嚿電。所以大家最好唔好問我借充電器，我好驚（手機沒電）！」劉穎鏇和林寶玉也有帶外置充電器外出的習慣。
相關閱讀：星級大搜查丨新一代「明星街市」大公開 檔主爆陳山聰、陳煒專攻煲湯料 呢個街市外圍最易偶遇藝人
手機電量不充滿100%是保養方法之一
香港資訊科技商會榮譽會長方保僑接受《星級大搜查》訪問，想盡量延長手機鋰電池壽命，可由充電習慣入手，他說：「如果嚿電一路維持喺100%充緊電，對電池個壽命都有影響。通常我哋都建議由20%開始充電至80%或90%，盡量唔好充滿。」而現時新型智能手機大多都具有保護電池功能，自動避免充電至100%。至於有指，一邊充電一邊用手機或增加爆炸風險，他表示：「如果會爆炸即係部機入面有啲問題，譬如電池有問題或者部機跌過，令佢入面結構有問題而導致短路。其實你充唔充住電嚟用，你充電嗰陣都有機會爆炸，所以呢樣要留意，盡量保養部機。」
相關閱讀：星級大搜查丨明星遇小人怎麼辦？ 193＠ERROR怒打Haters「小人頭」 直擊一蚊Joe鵝頸橋底打小人
打機、看影片最「食電」
方保僑指出常用需用到數據的應用程式固然是「食電」因素之一，部份常見的應用程式如IG、WhatsApp、facebook、YouTube等都需用不少電量運作。此外，看影片、打手機遊戲亦非常「食電」，他表示：「其實你不斷撳個螢光幕，個觸控屏都好食電。如果個遊戲仲有好多3D graphic需要用好多運轉速度嘅話就更加食電。」想省電可多用Wi-Fi，減少用5G數據，以及關閉沒有使用而藏在後台不斷運作的應用程式。
相關閱讀：星級大搜查丨明星千奇百趣恐懼症 P1X3L成員有尖嘴恐懼 糖妹最驚一種聲音 醫生：屬於精神病
避免下載不明來歷的應用程式
方保僑特別提醒大家，避免下載不明來歷的應用程式，「如果你發現有啲program好奇怪，其實我冇用過、唔常用，但佢喺後台運作緊甚至用好多Data，咁你要留意喇！譬如你裝咗可能以為佢係一個電筒嚟，但實際上佢係一隻木馬程式。我哋見好多騙案，呢啲Apps通常夜晚就好食電，有機會喺你唔覺意嘅情況下提取緊啲資料走。」你有沒有省電秘技分享，可留言給《星級大搜查》。
相關閱讀：星級大搜查丨邊位圈中人派利是最闊綽？張家輝爆有老闆「求其都派幾千」 森美：過千係基本 林峯封過萬
