黎寬怡結婚｜新娘晚宴低胸裙閃爆全場重溫求婚片段感動落淚兼晒金器承諾繼續闖曱甴屋

更新時間：11:30 2025-02-17 HKT
發佈時間：11:30 2025-02-17 HKT

30歲《東張西望》主持「貓仔」黎寬怡（Kitty）昨日（16日）正式成為人妻，與拍拖9年的攝影師男友馮俊昇（Sing）於西環聖堂舉行天主教儀式婚禮，昨晚假座香港北角一間酒店設宴。黎寬怡穿起閃閃低胸裙進場時明艷照人，當看到播出求婚片段時，她也忍不住再次感動落淚。

黎寬怡老公好貼心

黎寬怡與老公昨晚筵開19席，宴請超過230人參與，黎寬怡全日換上多套婚紗和晚裝裙，其中以進場時的一條銀色閃閃低胸裙最有睇頭，一向身形高䠷的她，原來上圍也相當豐滿。現場所有人開了手機燈照耀一對新人，黎寬怡小心翼翼地緩步而行，老公也貼心拖住老婆，而他本人則表現興奮，既大動作揮手，又向在場派飛吻，兩人又應兄弟姊妹團和賓客要求下連番咀嘴放閃。

東張女神黎寬怡結婚丨晚宴靚相曝光：

其後黎寬怡換上紅裙向賓客祝酒，其間播出8分鐘求婚片段，感動全場，而新娘也看得投入，不停拭淚，同時見到手上的龍鳳鈪、戒指和頸鏈等金器。新郎馮俊昇當日時彈住結他，在一班朋友幫手下成功求婚，他又指老婆很感性，看卡通片《多啦A夢》都會感動落淚，未來會經常帶老婆去旅行，享受二人世界。黎寬怡則感謝老公的包容，承諾會考慮生仔。

鄧凱文搶贏梁敏巧奪花球

昨晚《東張西望》都有播出黎寬怡昨午婚禮的片段，見到一班「東張女神」如梁敏巧、鄧凱文、俞可程及王汛文等都有出席，還有林淑敏、黃穎君及賴彥妤等。黎寬怡在拋花球時引起一眾女神爭奪，最終由鄧凱文搶到花球，更立即衝向鏡頭前說：「yeah！搶到啦，嫁得出啦！」

東張女神黎寬怡結婚｜東張女神搶花球：

黎寬怡結婚比拍戲更感動

黎寬怡接受鄧凱文訪問時表示很開心：「好感動啊，我覺得爸爸拖我出去教堂嘅時候我就已經忍唔住啦，我冇諗過原來喺幻想入面拍戲同自己行嘅時候係咁唔同㗎！」被問到會否減產時，黎寬怡馬上表示：「我最鍾意就係做《東張西望》，再去啲老鼠屋同曱甴屋我都唔怕㗎。」然後就甜絲絲問老公「可唔可以」，老公也馬上回應：「可以，可以」，相當甜蜜。