楊千嬅50歲千人生日P被粉絲公開醜照？談遭樂迷唾棄碎CD：熄機，唔好睇唔好理

更新時間：11:00 2024-02-05
發佈時間：11:00 2024-02-05

楊千嬅前日（3日）過50歲生日，踏入半百大日子，楊千嬅舉行迷你音樂會大派對，與近千粉絲同歡！楊千嬅更在台上提到自己多年來的心路歷程，包括近年遭網暴、被樂迷唾棄碎CD，對話真情流露。楊千嬅雖然中途強忍眼淚，但最終都忍不住，淚灑台上，有粉絲更把楊千嬅的喊樣分享上小紅書，天后瞇埋雙眼雙手拉眼角，勁似扮鬼臉。

相關閱讀：楊千嬅迎50歲孖丁子高低調放閃！逛名店揀禮物被網民曝光真實身形

楊千嬅生日派對：

楊千嬅一早決定香港過50歲生日

楊千嬅前晚正日生日，她為滿足歌迷的請求，在兩個星期籌備了這次超級粉絲聚會的生日會，楊千嬅在台上說：「我係香港出生長大，我一早決定50歲一定要喺呢度同家人及朋友過，好多謝你哋陪我過呢個生日，我真係冇諗過，自己唱歌會唱到半百，哈哈....除咗感恩、感激，呢段咁長人生路程，回頭望係非常精彩，亦從沒遺憾。今日嚟得嘅朋友，我知你哋已經係我家人，感謝你哋多年來選擇咗我，聽住我嘅歌，同我一齊成長，我好耐冇喺香港表演，我唔想喊呀，喊完鼻涕又變痰，唱唔到好唔抵，哈哈。」

楊千嬅：呢幾年我經歷咗好大考驗

楊千嬅唱畢多首歌後，感觸地說：「呢幾年你哋過得好嘛？我知大家走過唔同經歷，都一定係非常之唔容易，我自己都經歷咗好大考驗，相信大家都目測到我嘅過程，感謝曾經好擔心我嘅朋友，你哋唔駛擔心我，我過得好好！過程係好唔容易，但我終於知道，楊千嬅出生就係要學識解決問題，我發現我回望人生，我都係笑比哭嘅多，都係開心嘅人生。」

人生導師

楊千嬅猶如人生導師，把自己的低潮期作例子，勉勵歌迷，「過去嘅日子，經歷高山底谷，得到好多養份同智慧，我今日好想分享俾大家聽，之前嗰幾年都幾難過，你見到我唔係好出嚟，躲埋咁耐，時肥時腫，俾人影到畸形樣，哈哈哈......新時代網絡風暴係一個好震憾嘅經歷，我乜都遇過晒，幾十歲人我同自己講，有咩未見過？真係低處未算低，當我經過呢段日子，我發覺自己真係好強大，今日好感恩，上天俾我喺有力氣時，經歷呢個浩瀚人生。」

楊千嬅真情流露分享情緒問題，「低潮嘅情緒係無色無味，當人負面時，要容許自己唔開心，我都試過死頂，唔想俾人知我唔開心，刻意扮開心嗰陣，嚇親好多人，大家好擔心我，嗰一刻我又迷惘又唔知發生咩事，好困擾。」

楊千嬅與老公丁子高有幾閃？

楊千嬅被樂迷唾棄怕連累朋友

楊千嬅提到自己的唱片碎到一地都係，個心好痛，為免連累朋友，她不敢再關注朋友，「你鬧我冇問題，唔好鬧埋我啲朋友，諗住一個人撐唔好害人，曾經我覺得好恐怖，所以首先選擇熄機，唔好睇唔好理，唔好聽，休息啦，俾自己時間消化。」歌迷的力量，讓楊千嬅重新站起。

楊千嬅指收到很多歌迷的PM，給予很多鼓勵，其中一個歌迷，把她多年來在台上講的得獎感受，剪成三分多鐘的短片，「我一路睇一路喊，原來我同人講過嘅嘢，曾經幫到人，最後今日幫番我自己，我發現困難時只有自己救自己，唔好放棄自己。今日我想同愛我嘅人講，希望你記得，面對任何困難，記住有心跳就有希望，唔好放棄自己。我希望你哋可以愛自己，要有健康身體，永遠面對挑戰最高難度時，加油提升自己嘅能量，遇到最壞最唔開心嘅事，都係可以逆轉。」