星8卦｜「大胸」冧掂「擦鞋王」收樓衰氣焰得罪人即時炒魷

更新時間：11:00 2023-10-24 HKT
發佈時間：11:00 2023-10-24 HKT

「大胸」點都諗唔到自己會係史上最快被包養、最快被拋棄嘅小四、小五吧？話說「大胸」真係得對胸，別無長處，唔夠五呎，加埋高踭鞋勉強有嘅，勝在媚眼如絲，眼角含春，論樣貌嘛，扮小姐身邊嘅婢女，仲要係企門口嗰隻。不過佢又真係有本事，先搵「肥佬」搭通天地線，「肥佬」好色但孤寒，但勝在同「擦鞋王」日日玩埋一堆，亦知道做傍友要幫老細搵女開心，咁多年不死都係有呢個技能。

「肥佬」食得唔好嘥，「大胸」唔靚但滿足到男人嘅夢想，搞咗幾個月至彈畀「擦鞋王」，由於服侍周到，「擦鞋王」滿意到極仲即刻送咗層樓嘅首期，請記住，只係首期。當「大胸」以為自己好冧到「擦鞋王」之際，返到公司即刻擺出女主人嘅架勢，對其他人氣焰非常囂張。最衰佢唔係大口，但擺姿態就畀人知「擦鞋王」最近對佢好好，仲係認真嗰隻。咁就犯咗男人大忌，何況男人嘅老婆出咗名巴辣，而且操控住大部分財產。

「擦鞋王」玩咗3個月，雖然鍾意但都即刻叫公司人事部搵個藉口解約。「大胸」隔咗好耐都未知自己衰乜？而家浮浮沉沉，惟有北上努力搵老細。