星8卦｜「大胸」冧掂「擦鞋王」收楼衰气焰得罪人即时炒鱿

更新时间：11:00 2023-10-24 HKT
发布时间：11:00 2023-10-24 HKT

「大胸」点都谂唔到自己会系史上最快被包养、最快被抛弃嘅小四、小五吧？话说「大胸」真系得对胸，别无长处，唔够五呎，加埋高踭鞋勉强有嘅，胜在媚眼如丝，眼角含春，论样貌嘛，扮小姐身边嘅婢女，仲要系企门口𠮶只。不过佢又真系有本事，先揾「肥佬」搭通天地线，「肥佬」好色但孤寒，但胜在同「擦鞋王」日日玩埋一堆，亦知道做傍友要帮老细揾女开心，咁多年不死都系有呢个技能。

「肥佬」食得唔好嘥，「大胸」唔靓但满足到男人嘅梦想，搞咗几个月至弹畀「擦鞋王」，由于服侍周到，「擦鞋王」满意到极仲即刻送咗层楼嘅首期，请记住，只系首期。当「大胸」以为自己好冧到「擦鞋王」之际，返到公司即刻摆出女主人嘅架势，对其他人气焰非常嚣张。最衰佢唔系大口，但摆姿态就畀人知「擦鞋王」最近对佢好好，仲系认真𠮶只。咁就犯咗男人大忌，何况男人嘅老婆出咗名巴辣，而且操控住大部分财产。

「擦鞋王」玩咗3个月，虽然钟意但都即刻叫公司人事部揾个借口解约。「大胸」隔咗好耐都未知自己衰乜？而家浮浮沉沉，惟有北上努力揾老细。