星8卦｜「大眼」被奶奶嫌尅夫「空心」生意失敗姓賴拋妻棄子

更新時間：11:00 2023-08-22 HKT
發佈時間：11:00 2023-08-22 HKT

「大眼」條命真係好坎坷，當日參加比賽攞咗獎就俾「空心」𥄫中，因為做開順得人行業，所以好識服侍老細。「空心」一直都好玩得，去到呢個時候就想定落嚟。而之前嗰幾個女人都好旺「空心」，靠食老竇畀自己嘅生意都賺到唔少嚟溝女。問題係「大眼」一見到「空心」阿媽，老人家即刻同阿仔講呢個女人對眼唔多祥和，恐怕會令到「空心」事業唔好，即係直啲講句係尅夫囉！

但「空心」唔信邪，覺得自己都做得好掂，面面俱圓，商場上好多人畀面自己，做嘢靠實力啫，堅決娶「大眼」入門，奶奶一直對佢面色唔好，十分嫌棄，就算生咗幾個仔都無一日覺得滿意。「大眼」一直好委屈，但老人家唔知係咪真係見得人多，竟然俾佢講中，「空心」因為一單大陸投資唔見咗半副身家，要老竇出手救，呢個時候突然醒咗賴「大眼」陀衰家，仲喺上面有埋個妹妹仔。

「大眼」一時忍唔住，提出離婚，奶奶第一時間贊成，仲要連啲孫都唔理，「大眼」一個女人仔而家帶住幾個細路，「空心」又無錢畀，惟有叫以前幫佢舖路嘅「奶媽」介紹生意，利用女人本錢討生活囉！