【獨家】引大批粉絲購票入場追星姜濤AL遊樂園甜隊Churros

即時娛樂

更新時間：22:43 2021-07-18 HKT
發佈時間：17:10 2021-07-18 HKT

AL為姜濤買定飲品及Churros，在場粉絲即笑他拎住「大支嘢」！

人氣男團MIRROR今日（18日）派出5位成員姜濤、「教主」Anson Lo（盧瀚霆，AL）、Jer（柳應廷）、Stanley（邱士縉）及Jeremy（李駿傑）到主題樂園拍片。眾人於清晨時份已抵達樂園做準備，本來個個都一副睡眼惺忪的模樣，但一埋位即展現精靈樣，相當專業。五子分成兩組拍攝，當中姜濤與AL湊一組，雖然近日《大叔的愛》熱浪直捲全城，AL和Edan（呂爵安）的「登神CP」大受歡迎，但「姜son CP」人氣未減，近日「鏡粉」更集氣要求《大》劇開拍續集或電影版時，加入姜濤；而今次「姜son CP」再度合體，亦即吸引大批「鏡粉」購票入場追星！

為食的姜濤一見到條Churros即興奮大啖狂食！

人稱「盧汗停」的AL居然熱到要工作人員幫手吹風扇！

早前因於「小暑」穿超厚大褸而獲封「盧汗停」的AL今次卻一反常態，不單止一身輕便衣著，仲有工作人員不停為他吹風扇，AL都仍然大呼熱，反觀姜濤就着恤衫披外套，真係睇見都滴汗！正式開拍時，講述AL在餐廳內為姜濤預先購買了飲品及Churros（吉拿棒），搞到在場粉絲笑指「教主」拎住「大支嘢」，而出名為食的姜濤一見到條Churros，即興奮地大啖狂食，連AL也被其幸福食相吸引到向他索食，當然姜濤也大方分享，場面惹笑！連同NG，姜濤共食了3、4條「大支嘢」，拍畢他都輕輕嘆口氣，似乎終於嗒夠。