港聞

娛樂

最Hit

即時

中國

國際

星島申訴王

財經

地產

生活

健康

教育

體育

大灣區

專欄

馬經

PLUS

【頭條獨家】開網上頻道拍片諷刺時弊 Ben Sir戴定頭盔搞創作

即時娛樂

更新時間：11:27 2020-12-04 HKT
發佈時間：00:28 2020-12-04 HKT

Ben Sir請來老友曾美華齊演《戲B》之《陰質教育：毋忘初心》。

諗頭多多嘅歐陽偉豪（Ben Sir）喺疫情下冇停步，正積極搞緊教育者聯盟，做中間人角色為社福機構招聘大學生精英。另外他又同楊秉基導演開《戲B》YouTube頻道，以故事短片形式嚟講社會話題，鼓勵大家逆境自強，當中有啲對白嗒落有味，令人會心微笑。採訪：方騫平

《我和空姐有個約會》由大裁員講到被解僱原因，令人有反思。

Ben Sir同曾美華喺《陰質教育：毋忘初心》中扮中學生，過足戲癮。

《戲B》由Ben Sir孭飛，過足戲癮，暫時播咗9集，超過18萬人收睇，當中有啲諷刺社會時弊，較敏感對白嗒落有味，好似《我和空姐有個約會》中「無能的人是無情無義的，對我們航空業開完刀，好快就會對老師開刀…」《陰質教育：毋忘初心》又講到：「報警仲危險啦！」

曾做過大學老師的Ben Sir同年輕人冇代溝，跟一班後生仔女曾淑雅、戴祖儀、林穎彤、鄭衍鋒好玩得埋。

夾縫中表達訊息
不過，導演楊秉基就解讀話：「空姐條片帶出嘅訊息係無論經歷幾多挫折，最重要都係繼續向目標起飛，而女主角就係被炒空姐，佢有幫手做剪片設計，證明機會留畀有準備嘅人。」Ben Sir就話：「想拍啲貼地片，令人反思，但就唔會有敏感題材，想Ben Sir死咩！所以我哋會戴定頭盔，自我審查！喺夾縫中做創作先至珍貴，其實唔難拿捏，在乎互相尊重。」有份演《陰質教育：毋忘初心》的主播曾美華認為每日生活就係時弊，片中她同Ben Sir扮成中學生，一鏡到底拍攝，相當好玩。Ben Sir笑說：「其實我目標想做『最佳新晉演員』，最想有金主投資我拍學校題材嘅笑片，因為學校係社會縮影，暫時先按《戲B》忠旨『做好人戲，就有人氣，否則被人棄』，拍戲只係後話。」