港聞

娛樂

最Hit

即時

中國

國際

星島申訴王

財經

地產

生活

健康

教育

體育

大灣區

專欄

馬經

PLUS

【頭條獨家】讚黎耀祥有晒攻略搶錢農夫笑言喺Do姐面前冇廉恥

即時娛樂

更新時間：16:02 2020-07-21 HKT
發佈時間：23:00 2020-07-19 HKT

三人合作《Do姐有問題》至第四輯，更見默契。

組合農夫C君及陸永自從四年前同Do姐(鄭裕玲)主持《Do姐有問題》後，幾乎年年會再做一次，做到今次第4輯更有默契，喺節目中C君試過心直口快應Do姐：「咪諗緊囉！」即被Do姐罵：「你喝我呀？」互動得相當搞笑。被問到可有尷尬時？C君死撐說：「佢話我唔似人、乞兒咁都唔尷尬啦，喺佢面前係冇廉恥㗎！」採訪：方騫平

因為年輕，馮盈盈、劉佩玥玩遊戲時都要靠估。

張兆輝夠經驗，玩遊戲時邏輯推理好強，憑實力攞到五千多獎金。

農夫承認同Do姐合作得耐經已捉到節奏，明白大家做啲乜，陸永說：「今輯節目最有趣係睇返好多出世前嘅經典劇同昔日台慶片段，原來之前巨星劉青雲、周星馳係咁。」C君：「嘉賓愈年輕愈有趣，好似江嘉敏、劉穎鏇，喺外國返嚟嘅陳豪，完全唔識答，會亂咁答，但好好笑，視帝黎耀祥就最勁，佢睇晒每一集，所以好識玩，憑經驗、智慧、知識上嚟攞你啲錢咁，有晒攻略，唔係單靠運氣。」

黎耀祥好識玩，C君笑言擺明上嚟攞錢使。

Do姐號召力驚人，吸引稀客鄭秀文及蔡卓妍做嘉賓。

限聚令後開音樂會
兩人愈講愈興奮，更出埋鬼主意，好想喺最後一集由我哋做主持，Do姐變嘉賓玩遊戲。C君諗起都覺得好笑：「到時我哋有得喝佢話『快鬼啲答啦，諗幾耐呀！』我哋有提出過，佢好快拒絕，話諗吓先。」陸永話：「佢成日挑剔嘉賓，你估做嘉賓咁易呀？佢近年未必太知娛樂圈嘅嘢，可以考吓佢，TVB最高同最矮藝人同事係邊個？邊個Show錢最多。」另外，今年係農夫20周年，兩年前農夫話過20周年時做10首新歌，加10首舊歌remix，兩人真係做得到：「希望限聚令後，可以喺今年內做到一個新歌發佈音樂會，就算非樂迷入場都會變成樂迷。」