港聞

娛樂

最Hit

即時

中國

國際

星島申訴王

財經

地產

生活

健康

教育

體育

大灣區

專欄

馬經

PLUS

【頭條名人】首拍Kiss戲覺得好難楊柳青為出浴戲兩日唔飲水

即時娛樂

更新時間：23:53 2019-10-29 HKT
發佈時間：22:00 2019-10-29 HKT

在出浴戲中，Wiyona有個大露背鏡頭，為此她努力keep fit。

「新一代打女」楊柳青（Wiyona）最近在TVB新劇《解決師》中飾演性感女秘書，經常要着貼身衫出鏡，甚至要着三點式坐遊艇及拍大露背出浴戲，搞到佢好緊張，事前要日日做Gym兼戒口，拍攝前兩日開始唔飲水，希望「脫水」兩日令身形再靚啲。唔飲水好難捱，但唔及跟劇中情人李天翔Kiss辛苦，她笑言是首度獻出熒幕初吻，「無諗過錫錫都咁講技巧」，她表示除咗學拳、學揸槍，嚟緊都要苦練埋錫錫了。
撰文：李佩儀攝影：李維隆髮型：Kitty @haircorner 飾物：wowfahionhk 場地：Paper Moon

楊柳青在劇中是陳敏之的秘書，兩人勁多對手戲。

楊柳青平日每星期做3次gym，但拍此劇前就日日做。

楊柳青表示自己性格一向男仔頭，所以演女秘書是挑戰，幸好TVB準備好多靚衫靚鞋畀佢，她笑言：「一着起啲衫真係會斯文啲，行起路嚟都會扭吓扭吓。」有場戲要Wiyona爬上床跟情人李天翔談心，「我用平時爬上床嘅方法，點知男導演即刻叫停，再問我可唔可以婀娜啲，跟住佢跳上床示範畀我睇。」提到劇中要穿三點式和有出浴戲，Wiyona直言：「真係好緊張，因為我一向畀人感覺係做運動同打功夫，所以唔可以拍得唔靚，於是拍攝前我日日都做gym，食嘢又要清淡啲，戒飯、甜品同宵夜，拍攝前兩日仲要『脫水』等身形乾身啲靚啲。」所謂「脫水」是唔飲水落肚，但她有飲水去濕吓個口。

楊柳青最近上堂學揸槍，希望拍攝時有機會用到。

楊柳青學過詠春、泰拳、八卦掌和刀槍棍等，有一身好武功。

拍喊戲喊唔出
提到穿三點式拍攝場口， Wiyona說那場要色誘二世祖溫家偉，拍攝都算順利，不過出浴那場只能戴Nude Bra和穿肉色打底褲，她笑言：「感覺好似冇着咁，拍攝現場又多人，所以都幾尷尬。嗰場戲我仲要獻出我嘅熒幕初吻，我睇其他人拍接吻戲好浪漫，我以為我都做到，但原來唔係想像中咁易，都要講技巧，唔可以太猴擒，速度又要啱，大家嘅嘴唇位又要夾，（係咪要NG好多次？）都係拍咗半個鐘，因為要趕住交場，哈哈！」今次她還有另一個挑戰就是喊戲，她續稱一場喊得出一場喊唔出，喊極都流唔到眼淚，結果只能做到眼濕濕。」幸好今次她的對手陳敏之和李天翔都好好，經常提點她，又不時請她食飯，她笑稱像一家人真係拍得好開心！