ANSONBEAN哈佬喂玩cover 胸肌漲卜卜跳到爆鈕

更新時間：13:56 2021-10-29 HKT
發佈時間：15:30 2021-10-29 HKT

一手包辦度橋、排舞、錄歌、租場和道具。

創意多多的陳毅燊（ANSONBEAN），因為最近成日發夢玩「魷魚遊戲」，而且愛上Lil Nas X Jack Harlow新歌《INDUSTRY BABY》，他決定趁星期日是「萬聖節」製作自家企劃，一手包辦度橋、排舞、錄歌、租場和道具，大呼過癮，胸肌漲卜卜的他更跳到爆鈕，非常落力。新片今日（29日）中午已在ANSONBEAN的自家頻道上架，炒熱節日氣氛。
ANSONBEAN穿上「456｣號碼的綠色運動服，被戴上三角、正方和圓形圖案符號面具的紅衣人脅持，他踎在地上又舔又篤焦糖餅。鏡頭一轉在Club大舞場，ANSONBEAN換上型仔黑色西裝與紅衣人勁舞，胸肌漲卜卜的他一跳就爆鈕，全場嘩然，連他自己都忍不住大笑！

胸肌漲卜卜跳到爆鈕，非常落力。

之前企劃以跳舞為主，今次加入劇情。

今次自家企劃籌備一個多星期，期間撞正為少爺占開騷出任表演嘉賓，ANSONBEAN坦言時間緊迫好大壓力，但順利完成特別開心。由策劃到每個細節都一腳踢，辛苦但過癮，他說：「今次全部由我策劃，由度橋、搵道具、地方、演員、排舞、錄歌等，籌備咗一個多星期。自己一腳踢自由度好大，但要準備嘅嘢好多，全部自己搞掂，好有成功感。錄音過程學到好多嘢，能提升唱功，好好玩，同做自己嘅歌感覺好唔同。」
之前企劃以跳舞為主，今次加入劇情，一直希望拍武打片的ANSONBEAN，藉著今次企劃自肥一番。他說：「最有趣拍打交戲，加埋『魷魚遊戲』經典場口，好啱Halloween。下次可能會打得再勁啲，今次比較隨意，下次認真度啲更勁嘅場面，例如打爛晒啲嘢，或者用刀用槍。（今次都有道具槍喎！）唔係我用，我只係被人用槍射殺嗰個！」他表示曾經在「萬聖節」扮鬼修女與同學四處嚇人，今年都會繼續玩，至於造型就賣關子。