《ART呃》圓滿落幕感激觀眾力撐　黃秋生獲朱栢康吻賀「登六」

更新時間：22:50 2021-08-30 HKT
發佈時間：01:30 2021-08-31 HKT

15場舞台劇《ART呃》日前完滿落幕。

由神戲劇場藝術總監黃秋生與陳淑儀、朱栢康（朱康）主演的15場舞台劇《ART呃》日前完滿落幕，完場謝幕時，一眾台前幕後工作人員趁機，與觀眾一齊祝賀周四（2日）「登六」的秋生，觀眾們又跟他大合照。曾說今年是告別，明年是復出的秋生，對於今次演出既享受又不捨，百感交集，他感觸地說︰「咁多不穩定嘅因素同不可控嘅因素下，呢個戲隔咗兩年，因為各種原因先至可以演出，演出時最先話7成入座，之後到8成半，咁嘅環境究竟有冇人睇戲呢？我真係冇乜信心，但呢十幾場觀眾話我聽，我係可以繼續落去，多謝大家！」

秋生多謝觀眾支持，讓他們順利完成15場演出。

秋生與觀眾大合照。

騷後，眾演員及團隊食西班牙菜慶功，席間大家唱生日歌及送上蛋糕，預祝秋生60歲大壽，當朱康、陳淑儀上前祝賀壽星時，前者更熱情攬實大師兄秋生吻賀，令現場氣氛升溫，秋生表示生日願望是身體健康。

與兩位師兄首度合作的朱康，直言是次是其演藝生涯中很重要的里程碑，他說︰「好開心順利完成，觀眾反應好好。今次係好滿足嘅交流，而且係我演出上嘅里程碑，好希望同兩位師兄有下一次嘅合作。」對於觀眾對他的演出讚不絕口，朱康謙稱︰「當然開心，我會將一切榮耀歸上帝，覺得是上帝嘅安排。」

慶功期間，大家唱生日歌及送上蛋糕，預祝秋生60歲大壽。

朱康和陳淑儀對今次演出感受都好深。

至於陳淑儀亦有一番感受，他說︰「首先慶幸自己仲可以企上台，畢竟我3年冇上台，有點返屋企但未熟悉嘅感覺，原來我仲企得到上去。今次好開心同大師兄、朱康合作，呢個組合無敵，而今次之後，大師兄會不會繼續再做呢？令我感受好大。」而導演張耀銘表示今次合作獲益良多，他說︰「感覺我哋係四為一體，不論出來嘅成果係如何，今次係一個好power of嘅過程，好多得益和學習。」