「老鼠屎」游嘉欣羅毓儀拖累隊友接受大懲罰着住羽絨食「加料」麻辣火鍋

更新時間：16:33 2021-08-16 HKT
發佈時間：20:00 2021-08-16 HKT

蔚雨芯的身材勁吸晴。

一連四集的全新無綫綜藝節目《開心大綜藝之暑假玩到盡》昨晚（15日）八點半推出，首集嘉賓分成兩隊進行多輪水上競技遊戲，黃美棋、蔚雨芯、陳嘉桓及林秀怡在郭子豪及周志康率領下組成「康豪隊」，游嘉欣、羅毓儀及黃婧靈（波波）則由楊潮凱、翟威廉帶領下組成「威潮隊」。眾人每個回合均豁出去玩到盡，連主持林盛斌及區永權亦加入混戰癲埋一份，場面混亂又搞笑！經過數輪混戰，「威潮隊」最終慘敗，要在三十多度高溫下著羽絨戴冷帽食「加料」麻辣火鍋。

林盛斌坦言第一集嘉賓好曳。

場面混亂。

「威潮隊」落敗主因，全因三名小花隊員全是「老鼠屎」，原本領先一個回合的「威潮」隊，因為波波在上訴環節出茅招「搬龍門」失分，令「康豪隊」追成平手。而在另一個類似水上接龍的遊戲環節，波波、游嘉欣及羅毓儀多番出現失誤，獲眾人兜頭兜面瘋狂淋水！先是羅毓儀指「避孕套」可戴在頭上，再有波波篤錯灰「誤殺」隊長楊潮凱，以及游嘉欣多番語塞忘詞。由於游嘉欣在上一個掟Cream環節已論盡跣倒惹起關注，如今再度失誤即獲Bob封為「游嘉Kick」，Bob搞笑謂：「次次都喺你度Kick住咗嘅，你唔好叫游游啦，叫Kick Kick啦！」而全程表現精靈的美棋BB，在跳呼拉圈環節則因身高問題意外受創；之後再遭「豬隊長」郭子豪擺烏龍慘遭壓倒地上，堪稱本集「慘情之最」。

翟威廉成為眾矢之的

大家都豁出去玩到盡！

男子組方面，則由翟威廉成為眾矢之的，事緣在「勁滑射手球」環節，翟威廉意外撲倒眾人女神蔚雨芯，即時遭「圍攻」兼令「威潮隊」被扣分；而在之後的掟Cream環節，翟威廉再被「針對」，被指「彈弓腳」遭瘋狂掟Cream，最終面目全非，相當搞笑。主持之一的林盛斌坦言第一集嘉賓好曳，但卻笑言：「其實好多失控場面係我引發出嚟嘅。（你都好曳？）唔果唔係監製都唔會搵我啦。」