【三缺一】C AllStar新歌MV火場逃生釗峰下落不明

更新時間：17:34 2021-07-07 HKT
發佈時間：14:35 2021-07-07 HKT

救火3兄弟。

C AllStar日前為合體後第三首新歌《沒明日的恐懼》拍攝MV，這歌是他們成軍以來，首次演繹成員何建曦（Jase）填詞作品，4子顯得份外投入賣力。Jase說：「MV故事係個世界剩低好少人類，每個人都有角色前設，我係有錢佬，On仔係流浪漢。雖然MV唔係完全跟據歌詞拍攝，但意念都係一樣：『如果沒明日，大家點樣自處呢？』」On仔續說：「所以導演以一對男女主角兩日後要分離嘅故事嚟表達，呢兩日佢哋會做咩？」
其中一幕火災場景，On仔、Jase和King預先以特技化妝弄得血流披面，傷痕累累，前往上車路上扮流氓扮被打傷，但沒有途人上檔。King笑說：「因為做唔到世界末日大場面嘅悲壯場景，所以我哋用一場火災交代。剛才我哋同啲火好接近，幾乎燒到背脊。（Jase問：有冇燒起你對音樂團火？）燃燒晒！」On仔則說：「剛才唔只火勢好勁，仲有爆炸添！」King坦言好驚！
他們又稱導演預先叮囑他們「帶多兩條底褲」，但他們都以為導演講笑。King說：「我以為救火嘅水會噴濕我哋，點知係因為來回跑入火場，全身濕透汗水。」拍攝順利完成，驚險過後On仔變得好風騷，穿著黑色背心的他唱《友情歲月》歌詞「消失的光陰散在風裹」。好唱口因為就快紅館開騷，對於門票火速售罄，他們齊聲表示希望加場，更揚言：「100場都唱呀！」

台前幕後火場留影。

C AllStar穿插男女主角中。

MV中火災重頭戲，C AllStar卻三缺一，原來釗峰另有任務。他說：「我3個兄弟去救火，點解我唔喺嗰度？唔透露，畀大家想像空間。C AllStar喺MV幫男女主角收集回憶，我角色就好似個壞人，將紀錄咗佢哋美好片段嘅錄影機關掉，好似一下子毁滅晒所有回憶咁。」另一場戲，On仔和King與男女主角「最後晚餐」後道別，On仔忍不住眼濕濕，但King表現冷靜。Jase見怪不怪，說：「King最冷靜，上次紅館唱《此刻無價》，我哋3個喊到停唔到，唯獨佢企喺一邊望住我哋，冇喊。」King解釋自己只是用另一個方式去投入當時氣氛，只是沒有流出眼淚。