【頭條獨家】徒步18日京都到東京有所感悟吳業坤遇困難堅持就有曙光

更新時間：01:20 2021-03-26 HKT
發佈時間：22:17 2021-03-25 HKT

有鐵粉喺終點站日本東京橋迎接坤哥。

吳業坤(坤哥)趁住30歲於超齡前趕「尾班車」，去年11月中到日本Working Holiday，2月28日就啟動「東海道53次」，由京都徒步到東京，最後坤哥多出原定時間兩日，共用咗18日完成全程約492公里旅程。坤哥話今次行程有苦有樂，總之飽歷風吹雨打令他頓悟人生真諦：「人生道路幾咁困難都要一個人去堅持，只要捱得住，曙光會再現！」採訪：方騫平

短留東京幾日添置咗啲新衫後，坤哥坐飛機去長崎，仲換上和服到大村公園賞櫻，四月櫻花盛放中，超靚。

腳又痛又凍，要靠拐仗做第3及第4條腿！坤哥話呢個旅程唔簡單，係一個挑戰。

吳業坤頭兩個月喺日本抱住「佛系」心態，冇積極搵工，日日瞓到自然醒就去醫肚，悠悠閒閒體驗當地人生活，學吓日文會話等，唔使媾日本妹，日文都進步神速，普通對話絕對唔係問題。後期他發覺，原來工作假期乜都冇做過，最終決定挑戰自己，啟動「東海道53次」。

中途行到出晒汗，勁攰，但好enjoy。

雖然行程好艱苦，但抬頭一看竟然見到富士山，真係乜都值得。

沿途欣賞風光感受文化

「東海道53次」唔容易捱，雖然坤哥只係孭住簡單行裝，但不論晴天雨天，日頭及夜晚，每日要行30至40公里都係一個負擔：「第一日對腳痛到不得了，但拐住都要行，結果較預計時間遲咗兩個小時，直到夜晚11點先去到酒店，到第二日仲要夜晚拐住行山路，每行半個鐘就要休息吓，直至去到第5日身體先開始習慣，打後都能夠如期抵達酒店。原來唔行唔知身體差，唔到自己認叻。不過，沿途風景明媚，亦感受到唔同嘅文化，好似西南面靜岡啲人比較好客，東京人有都市冷漠。」

因為體力有限，每日極限行30公里，所以一定唔可以行錯路，就算有次漏咗件風褸都唔可以返轉頭拎，最怕誤時因為夜晚好凍，摸黑條路更難行，體力及意志都會更薄弱：「呢個旅程好似人生縮影咁，人生道路上唔可以返轉頭，只要喺困難中堅持落去就會有曙光，正如有日我行到好攰，抬頭一望竟然見到好靚嘅富士山，嗰刻真係好感動。」