男友陳志忠確診胃癌患類風濕關節炎「賈名媛」邱芷微逆境下愁到爆

更新時間：20:56 2020-10-18 HKT
發佈時間：20:33 2020-10-18 HKT

邱芷微本身有類風濕關節炎，手尾相當長。

無綫處境劇《愛．回家之開心速遞》的「賈名媛」邱芷微（Chelffy）同「大小姐」林淑敏係死敵，搞完「細龍太」陳偉琪，又挑戰「龔水戀」，非常搶Fo，觀眾都好鍾意睇佢「出招」帶出嘅火花㗎！不過近月她就真係多災多難，除咗發現患上類風濕關節炎，收尾好長令她煩爆外，前TVB功夫新星男友陳志忠(Wilson)近日確診患上初期胃癌，周前要緊急切胃保命，幸而手術順利，日後要少食多餐，多關注身體狀況及變化。

邱芷微今日喺社交網留言為男友報平安：「呢幾個月真係可以講話多災多難，不過都總算大步攬過。感謝大家對我及陳師傅Wilson嘅問候及關心。近排的確係有少少吃力的，因為自己本身都有類風濕關節炎，手腳靈活度都時好時壞，所以除了自己要經常睇醫生之外，面對着Wilson突然變咗胃癌，上星期才做完切胃手術之後的康復生活亦有少少改變。好彩佢嘅體格本身都強，所以康復程度比預期都快。佢亦都係一個算係好勤力做research的病人去了解自己的病情，所以好多嘢，佢都好快咁尋求到解決方法。

以前我都唔了解我自己個病以及胃癌，但呢幾個月真係因為雙方的身體健康出了變化，令到大家除了珍惜眼前人之外，亦都想喺度同大家講，就算平時工作有幾忙，有時間真係要去做body check，仲有一定要買保險！今次我哋兩個都算早發現的病例，所以唔好以為平時冇病冇痛就代表冇事。

關於經營演藝學院，學院仍然正常運作。我其實在Wilson入院的這段期間，我亦都照常在店內打點營業，課程仍然照常上的。如有任何有關課程上課，問題歡迎聯絡我大家放心，我會撐得住的。」

邱芷微緊握男友雙手為打氣。

邱芷微近日都頻頻睇醫生，治療類風濕關節炎。

另外，她又留言表示：「知道大家得知Wilson Chan患了胃癌這個消息之後，身邊認識我同佢嘅朋友都紛紛打俾佢之外，同一時間我亦都收到好多WhatsApp問候我，感謝大家關心。我哋一定撐得住，人生嘅嘢關關難過關關過，2020年總算是考驗的一年，但我都會撐得住的。」

邱芷微接受頭條訪問時稱，男友一個月先曾入浸會醫院照胃鏡，本來話係胃潰瘍，但醫生攞咗啲壞死組織去化驗，出院之後冇耐返去睇報告，結果證實係胃癌初期，聽到壞消息後簡直晴天霹靂，好彩早發現冇擴散，之後她陪男友先後睇咗4個醫生，單係周圍睇醫生都使咗好多錢，最後請來教授級醫生操刀，手術順利，買保險亦claim足，算係過咗難關：「所以呢排我就辛苦少少，自己本身都有病要成日睇醫生做治療，又要管理公司生意，同時要照顧佢，不過頂得順嘅。」