離開TVB唔使再做下靶位變身主角艾威：𠵱家搵錢比以前多

更新時間：19:46 2020-08-26 HKT
發佈時間：19:27 2020-08-26 HKT

艾威就話苑仔是自己「債主」，訪問會隨傳隨到。

早前傳出婚變的艾威日前接受好友苑瓊丹邀請，亮相香港開電視《開工大吉77》，艾威就話苑仔是自己「債主」，因此隨傳隨到做訪問：「上年有一件事佢幫咗我大忙，我話要請佢食飯答謝，點知唔夠佢快手爭埋單，搞到人情債愈滾愈大，所以佢話做嘉賓即刻答應。」

節目中艾威自爆真名原叫「徐威信」，因為星途向師傅關海山請教：「蝦叔佢係我師傅，佢話我個名唔太似戲行啲人，所以叫我改名，我改『艾威』係因為『艾』字相對西化，『威』字就好剛猛。當時入行有人教我搵個師傅做榜樣，跟住佢做就走少啲冤枉路，所以我就拜師學藝喇。」

艾威好尊重已故師傅蝦叔。

離開TVB後，艾威唔使只係做閒角。

艾威指行內有三位前輩令自己佩服，將角角活現鏡頭前：「蝦叔、鵬哥（盧海鵬）、羅家良佢地三個唔會『唸口枉』，係用個心去記台詞，我發現死背對白係唔會演好場戲。」艾威坦言視演員為終身職業，但發展到某階段，開始發主角夢：「人可能係貪心，你會覺得主角嘅戲先有血有肉，綠葉當然好重要，但係都想參與大劇、大電影，但你知道自己嘅定位，唔會有突破，甚至有製作人同我講，佢地曾經向高層推薦我去一定位置，但被高層否決。」

早年艾威被舊同學王維基邀請加盟，離開服務33年的舊公司：「有次校友會聚會，佢話會開電視台，問我『過唔過去幫手？』我都未傾錢即刻話過！以前唔走係因為冇第二個台之嘛，咁多年都係喺下靶位，咁梗係走啦！」

艾威亦透露離開後，搵錢比以前多，更多機會參演幕前的崗位：「以前我連遊戲節目都未試過，𠵱家做過旅遊節目主持、做過主角、出書做作者等，疫情下我咪拍吓短視頻，亦準備再寫書，咩都試吓。」