【父子檔】新歌《日月》MV搵老竇幫拖演出關智斌：家用會加番

更新時間：01:33 2020-05-14 HKT
發佈時間：11:30 2020-05-14 HKT

Kenny 𥄫實關爸爸化妝和整頭。

關智斌（Kenny）剛推出新歌《日月》，由多年戰友陳子龍作曲、編曲及監製，這首度身訂造之作，他坦言第一次聽到旋律便十分喜歡，「特別係一開始的嘅鋼琴聲，一聽到就覺得好感動。」《日月》講述人的一生遇過很多人，當中不乏在困難時伸手扶持、讓我們倚靠的人，親如家人；疏如短暫共事的同事，他們的幫助或鼓勵有時可能只是微不足道，卻令你銘記於心，一點一滴累積下來，正正成就了今天的自己，「所以呢隻歌我想送俾所有呢啲喺我生命中幫助過我嘅人。」錄音時，Kenny亦嘗試了多種不同的方式演繹歌曲，「最後試到用一種暖男嘅感覺唱出呢首歌，因為想俾到大家一種好warm嘅感覺。」

Kenny大讚關爸爸拍攝時表現專業。

Kenny邀來陳詠燊（後中）執導，以及陳湛文（後左）演出。

歌曲MV由陳詠燊執導，內容講述老一輩用自己手藝養育下一代及上一代，以裁縫一角說出三代關係，Kenny大讚故事性強，演員方面特別找來去年憑《三夫》入圍「香港電影金像獎—最佳新演員」的陳湛文（Peter），除此之外，MV更請來一位神秘嘉賓，「就係我Daddy！阿關老先生啦！」問到為何找父親出演角色，Kenny解釋：「因為同導演一齊去create呢個故仔嘅時候，大家諗由老、中、青三代角度去拍攝，故事入面嘅爸爸係犧牲咗好多自己嘅時間，成全咗三代人嘅幸福，好似我爸爸做緊嘅嘢咁。我突然間諗到既然呢首歌係講喺我生命中對我好重要嘅人，加上『爺爺』呢個角色戲份唔算好重，又唔使做好多戲，所以我就諗不如叫我Daddy去試吓。」

MV中，Kenny以說書人身份演出。

Kenny更透露拍攝MV「咪嘴」部份時，唱到歌詞「捱壞了幾多無從逃避才學會這叫成長滋味」一時感觸唱不下去，「腦入面諗起好多同我Daddy嘅片段，突然觸動到，呢一部份都有剪埋落MV入面。」

MV拍攝現場，首次幕前演出的關爸爸坦然十分緊張，不過Kenny卻大讚父親表現專業，「最開心係見到我Daddy拍攝得好開心。見到佢化妝、整頭、埋位都好專業，令我都發現我嘅演藝天份原來可能都係來自於我爸爸。」原來關爸爸在學生時代曾被老師選中當話劇男主角，不過關爸爸因為對白太多而拒絕，Kenny立即大呻：「你知唔知你個仔我，真係要艱辛咗好多年先至可以做男主角呀老竇？」關爸爸亦隨即安慰，「咁我唔係（演戲）嗰塊材料吖嘛！𠵱家咪留番俾你囉！」十分搞笑。除了當話劇在男主角，關爸爸亦透露當年畢業後打算投考電視台的藝員訓練班，可惜最後欠缺勇氣而告吹，在旁的Kenny聽到後笑說：「好彩你冇咋，如果唔係到時未必生我出嚟，如果唔係邊有咁快追咗我阿媽番嚟，到時我分分鐘未出世，𠵱家咪冇得坐喺度叫你拍MV？哈哈！」Kenny表示沒想過請得老父出山，問到酬勞會否特別加碼，Kenny笑言：「係搭膊頭，因為家用我會酌量加番啲。」