做完城城先幫黎明雷頌德認笨唔敢食兩家茶禮

更新時間：20:19 2020-05-07 HKT
發佈時間：18:14 2020-05-07 HKT

雷頌德接受主播人許文軒訪問。

樂壇四大天王中，雷頌德(Mark)跟黎明及郭富城都好有淵源。之前他接受J2節目《我們的音樂時代》主持人許文軒(Edmond)訪問時剖白說：「當時四大天王已經好紅，開始有阻力，係小美搵我打做郭富城，我要幫佢更上一層樓嘅同時，亦要省靚我自己嘅招牌，因為《純真傳說》同《強》嘅成功，先開始多人用我嘅歌。」

「另方面，黎明亦有搵過我，但我推咗，我認我笨，我覺得冇理由食幾家茶禮，咁樣唔Work，因為四位天王喺市埸上已經係鬥緊，直至郭富城冇搵我做，我先應承黎明。當時黎明去到一個樽頸、停頓位，我又要幫佢洗底，成為洗底王，全力做咗《情深說話未曾講》。」

至於為黎明打造快歌原來係Leon主意：「佢話個市場冇乜歌曲可以令人跳舞，所以我即刻寫咗好多首，點知佢唔收貨話唔OK，話呢啲唔係亞洲人嘅快歌，未能令人聞歌起舞，嘩！佢話我啲嘢唔得喎！當時我哋有啲衝突，佢叫我跟佢去韓國，我哋落咗當地嘅Club同Disco去感受咩先係亞洲人嘅跳舞歌，仲留咗喺韓國個幾星期研究，之後做咗《全日愛》同《眼睛想旅行》等」