【頭條獨家】小學曾成欺凌對象馬天佑新歌望為受害者發聲

更新時間：19:48 2020-04-14 HKT
發佈時間：21:30 2020-04-14 HKT

《鹿角少年》MV搵來新人周寧扮被欺凌學生。

馬天佑（Mayao）最近推出新歌《鹿角少年》，以欺凌問題做主題。原來他小學時期也曾是被欺凌對象，試過畀霍啟人等同學仔攞腰帶鞭打，雖然情況不算嚴重，但他好明白被欺凌者的感受，加上近年這類新聞愈來愈多，所以他更加希望能為同樣被欺凌者發聲，希望他們不要懼怕，而社會亦能正視問題。採訪：杜淑霞服裝：@casablancabrand@lancrawford場地：香港瑰麗酒店

MV中，周寧為了不做被欺凌對象，每日勤練武功自衛。

Mayao早前請來同學仔霍啟人接受他的直播訪問。

馬天佑轉做獨立歌手後，歌曲題材自由度更大，今次就以近年社會熱議的欺凌問題做主題，「我跟填詞人Oscar溝通後，用了以物法比喻自己為一隻優雅嘅鹿，被欺凌只係因對方猜疑、妒忌同安全感，繼而變成灰狼，他們亦身不由己地慢慢墜入黑暗。所以被欺凌嘅人要記住，我哋千萬唔好逃避，因為喺無助、絕望之時，總會有人陪喺你身邊。」

疫情下，Mayao帶住口罩去公園做運動。

疫情初期，Mayao跟朋友到了北海道旅行。

MV自己冇份演
小學時Mayao因身形瘦削，講嘢又陰聲細氣而成為同學欺凌對象，「嗰時大約讀五、六年級，試過啲同學專登行過嚟撞我膊頭，甚至圍埋攞條腰帶嚟打我，但情況唔算好嚴重，我冇同屋企人或者學校投訴過，後尾我靠學做話劇，令自己講嘢更有自信同大聲咗，之後都有同啲同學做番朋友㗎！」日前其中一個曾欺凌過他的同學霍震霆和朱玲玲的兒子霍啟人，仲親自現身他的直播節目，「我同佢由細識到大，嗰時佢都有份攞腰帶打我，但係後尾都有幫番我，我仲因為佢先去英國留學，我同佢講番件事佢都記得，仲肯幫手上嚟我嘅直播節目𠻹！」

Mayao又話想凸顯歌曲主題，MV自己反而冇份演，「MV講主角喺學校被欺凌後，終於鼓起勇氣偷拍欺凌者嘅罪行，自己再學習防禦術，以直接同積極態度去面對一羣醜惡嘅欺凌者，我扮學生唔係太好，所以搵咗周寧幫手。」