同Nowhere Boys拍MV 伊健教路唔化妝殘樣出鏡先夠凸出

更新時間：14:11 2019-09-01 HKT
發佈時間：12:12 2019-09-01 HKT

樂隊Nowhere Boys的主音Van獲偶像鄭伊健邀歌兼合唱新歌《時光歲月》，這歌原本由伊健獨唱，但他聽完Demo後提出合唱，「麵粉」Van生日當天得知喜訊後開心到想喊。完成錄音後，驚喜繼續來，伊健爽快答應一齊拍MV。
拍攝當日，平時口水多過茶的Van面對伊健立即變乖寶寶，更被隊友爆料「迫導演加戲」，Van立即解釋：「其實劇本一早寫好咗，我只係溫馨提示導演有呢場戲啫！（聽講你噚晚敷Mask打孖上？）我梗係要整好啲個樣，咁先至襯得起伊健！」伊健立即醒Van兩招，說：「我初出道嗰陣出鏡故意唔化妝，觀眾見到個個上鏡都咁靚，寧寧舍舍有一個唔化妝黑麻麻殘殘地，咁先夠特別！」每次埋位Van都異常緊張又姿整，遇上任何反光面都左照右照，在場工作人員為他鼓掌打氣，伊健見狀親自為他試位和睇playback，Van好感動。

MV於校園取景，Nowhere Boys成員和伊健分別飾演教師和學生，鼓勵年輕人勇敢追夢和珍惜友誼。Van說：「最初一心為寫畀伊健獨唱，旋律和歌詞都度身訂造，威逼利誘其他兄弟畀我完成夢想。後來伊健提議合唱，呢個消息係我今年最好嘅生日禮物。」身邊的伊健說：「對我嚟講都係好有意義嘅禮物。呢首歌由佢哋寫音樂和填詞，啲歌詞好有趣，將我哋兩代人連埋一齊。大家都知我咩年紀啦，雖然我哋嘅年紀有啲距離，但理想和理念可以一樣，唔受年代或年紀限制，唔使分得咁清楚，音樂係可以一齊玩，我覺得呢首歌好適合一班人一齊唱。『夢想』就係呢首歌嘅理念。」