楊秀惠入行12年受冷嘲挫折 憑新劇彈起
發佈時間：10:58 2016-11-13
生於馬來西亞的楊秀惠 （Vivien）因選美加入無線，在《來自喵喵星的你》色誘陳豪成話網民話題。她入行12年曾單獨承受過不少冷言冷語和挫折，更擔心語言上得罪人不時躲在家中喊，但憑著堅持和毅力，終做出成績。
Vivien於03年參加馬來西亞華裔小姐奪得冠軍後，翌年參加無線的國際華裔小姐而開始演藝事業。離開家鄉隻身來港發展演藝事業，她直言初時有掛念家人：「當時過嚟香港都抱住學習心態過嚟，的而且確係學到好多嘢。可能中間會辛苦，會有挫折，中間有想過放棄但都堅持，發現得到同學習的事更加多。」
入行12年，Vivien曾獨自面對不少冷嘲熱諷，曾被人話肥、「冇明星feel喎！」、「唔似演員唔識做戲！」、「廣東話唔得喎！」，加上無線的女藝人個個身材瘦，廣東話又好，令她覺得自己不足：「係咪真係選擇留喺呢度？再加上文化差異同埋話言上溝通，初頭真係溝通唔到，可能香港俗語都未必識得聽。」她指自己不是聰明人，用了5至6年才能適應香港文化，了解香港語言。
為求學好廣東話，Vivien多看電視劇集惡補廣東話，又自爆未入行前為人較文靜：「我細個唔識同人溝通，唔係好夠膽行出嚟嗰種人。由細到大都唔識講嘢，所以我親戚朋友都覺得好奇怪，秀惠有辦法响香港十幾年仲係做演員。」她稱頭幾年來到香港講廣東話都俾人笑，更加不敢說話，驚講錯俾人笑或者得罪人，經常因此事而喊。
除了演藝事業外，Vivien多年前已開設美容院及刨冰店，笑言是興趣：「嗰時我慢慢大，覺得我演技得咩？我可以好似其他演員咁幾十歲都做到咩？不如兩邊試吓，一開始生意唔錯，無線又搵我拍嘢，我嗰時諗不如推進自己嗰腦睇吓可以做到。唔可以因為做《姊妹淘》就生意做得差，或者生意做得好就唔記得演戲。」
原來Vivien選擇開美容店是與她外貌有關：「由細到大都覺得自己唔夠，我自己都睇到自己缺點。頭幾年睇電視都唔敢睇自己，我覺得自己好醜樣，就想靠化妝，等自己出嚟好啲。」有傳她曾經整容，她否認說：「如果我真係整容，我應該更加靚。」但秀惠稱不敢動刀，擔心會失敗變得更衰。她又笑言自己是「易容高手」，指自己化妝前後好大分別，試過落妝後照鏡被自己嚇親。
