亨利拆局│練馬師王吼姚本輝

更新時間：02:00 2026-09-13 HKT
發佈時間：02:00 2026-09-13 HKT

上期方嘉柏奪2W，區區24分已夠封王，可見當晚局勢平均，本欄推介有幸命中，但自問全靠符碌，因為賽前無諗過「後無來者」可得12分，出貼士也只納入配腳，反而信心大的「深心星」跑梗頸四，「正本唐心」亦三甲不入。不過講到尾，最終收錢是王道！

回說今次賽事，羅富全出馬八匹並非最好，然而「路路勁」、「快樂高球」與「實力股」都養眼，本來是練馬師王理想選擇。但話說回來，全哥只得以上三駒較突出，萬一有任何冬瓜豆腐或連場跑P，練馬師王就危危乎，況且預期佢練馬師王賠率必熱，還是另覓對象為妙。最終我揀姚本輝，皆因佢除了牌面馬「捷威」列陣，其餘多駒有路程根據，有可博之道，關鍵是「捷威」幫手攞12分，咁就安心得多。

重點爭分馬方面，「捷威」上仗以大超班姿態贏馬，確認已開竅，轉四歲照計只會更好。「輕功猛男」上季季初連場出擊，升上三班即停步，今次儲足體力在四班起步，有冷味。「超寫意」上仗贏「㩒住贏」，賽績硬淨。

目標：姚本輝

賠率：9

全日惡馬第六場：捷威

練馬師王最佳投注時機：第二場前