祖馬龍心水│「謙謙君子」信數據

更新時間：18:50 2025-09-16 HKT
發佈時間：18:50 2025-09-16 HKT

一眨眼就已經開季第四個賽日，唔知大家覺唔覺，有馬跑嘅日子過得特別快。

心理上同實際上都覺得依家係季初，但一年八十八個賽日，其實第四個賽日已經係全年嘅5%。所謂快樂不知時日過，跑多一陣就到聖誕，過多一陣個個專欄都話臨近季尾。近排祖馬龍有個覺悟，以往刨馬有時靠感覺、靠眼感，即使常有斬獲，但呢個方法確實唔科學。咁數據唔會呃人啩？但馬係生物，會成長，而馬房部署亦都佔咗一個重要因素，有時數據反而誤導咗大家刨馬。當大家都信數據嘅時候，祖馬龍逆向思維作作祟，反其道而行，咁究竟刨馬信數據定眼感好呢？

「謙謙君子」過往八次入位，五次跑短途一千，兩次贏馬亦都係跑一千。數據上已說明一切，話畀大家知佢跑一千好過千二。

不過，葉楚航部署手法五花八門，暑假嘅時候佢接受訪問，回應對自己過往嘅精心部署，完全係為咗馬主爭取最大利益，問心無愧。咁究竟今次是否搏殺呢？葉廄由開鑼到依家出馬十一匹，全數落第。結合所有數據，祖馬龍都係信馬多過信人，呢次我賭「謙謙君子」完全係有根有據，簡簡單單1W1P！

其餘場次，心水係尾場「太陽勇士」。上季佢鬥到最後一場勇奪百萬挑戰盃。根據經驗，過往好多百萬挑戰賽盟主都有排回氣，但「太陽勇士」贏完之後繼續有貨交，算係破格馬。暑期唞咗兩個月，臨開季兩課試閘省番靚仔，今次配潘頓孭一二九磅，坐位望贏！

第一場 8 謙謙君子 7 城中勇士 2 銀刺勇士
第八場 6 太陽勇士 7 遙遙領先 3 電訊巴打

↓立即下載星島頭條App↓