祖馬龍心水│「經典時代」坐位望贏

更新時間：19:15 2024-12-25 HKT
發佈時間：19:15 2024-12-25 HKT

上個賽日祖馬龍有幸進入董事廂房欣賞賽事，順便體驗裏面嘅伙食。如果要劃分，我覺得普通會員廂房同公眾廂房體驗差唔多，最多都係飛機高端經濟艙同經濟艙嘅分別，即係去廁所都係要人哋讓一讓，唔該借歪。

董事廂房就係頭等艙待遇，比如食刺身，呢度全部拖羅，完全見唔到赤身，加上伴碟亦有講究，更令祖馬龍讚嘆嘅竟然見到塊紫蘇葉；主菜點了乳鴿，亦已經去骨。平時，祖馬龍認為賽馬日最好唔好食自助餐，成日行出行入攞嘢食會阻礙賭馬，食中餐有服務員端上菜餚，可節省時間刨馬，哈哈！今次喺頭等艙食到去骨乳鴿嘅體驗，令祖馬龍震驚、欣賞、讚嘆不已，各個環節一絲不茍。不過，餐飲係其次，睇馬聯誼先係重點，今次大開眼界嘅體驗，夠祖馬龍講足一季，亦對於馬場體驗有一種成就解鎖嘅感覺。

回想完飲飽食醉，返嚟呢個賽日，環觀各場局勢殊不簡單。谷草C+3跑道形勢並非賽前能輕易掌握，以馬論馬，心水係第五場「經典時代」。佢上場時間唔算高水準，不過遇上今組對手就絕對夠用，廖康銘近三仗似摸索馬匹性能，既增程亦轉場地，終於喺谷草1650米試準，呢鋪排個內檔，試多課加油閘，信廖康銘今季精兵制逢出必拼，再搵埋馬房殺手霍宏聲，應該坐位望贏！最強對手係路程專家「赤馬雄風」，以及手執一檔嘅「爆笑」。「都靈勇士」贏馬加咗分，假若繼續支持要諗多幾諗；「帥炸」配旺人周同學兼排靚檔，腳患馬不穩但可拖，唔腳痛就有權憑田草級數殺晒。餘駒實力較次，惟3T次關假如有其他冷門心水就不妨拖埋。。

第五場：6經典時代、2爆笑、1赤馬雄風
第九場：7美麗緣分、4晨曦儷人、2家樂龍駒

↓立即下載星島頭條App↓