Chok王心得｜覺士盾沸騰血脈

更新時間：17:58 2023-10-29 HKT
發佈時間：17:58 2023-10-29 HKT

不嬲好少睇或賭海外賽事，一來唔鍾意隔山買牛，感覺唔良好；第二，唔想增添煩惱。事關單是刨本地賽已經花光所有力氣。然而上周末專登買少少齋W兼企喺電視機旁邊，觀看「浪漫勇士」角逐覺士盾過程。嘩！唔睇猶自可，睇完整個人血脈沸騰，堅係精彩刺激。唔係睇埋慢鏡，都唔知鹿死誰手。
「浪漫勇士」馬主賽後接受訪問時透露，今次覺士盾比賽最後嗰五秒，係佢人生中養馬以來最刺激、最緊張嗰五秒。作為觀眾嘅我，亦都感同身受。始終香港馬遠征而成功例子，近年來比較少見（可能係我孤漏寡聞），何況係覺士盾呢類大賽！
尚記得當年「翠河」遠征美國雅靈頓百萬大賽，賽前以為呢匹香港馬王有本事揚威，點知原來唔係咁，自始才明白香港賽事水準與世界未完全接軌。不過，自從「靚蝦王」在安田紀念賽獲勝，揭開新的一頁，往後香港馬陸陸續續在世界舞台發光發亮。

洪禮賢

立即下載 | 全新《星島頭條》APP : https://bit.ly/3yLrgYZ