龍之心形勢大好

更新時間：03:00 2023-06-10
發佈時間：03:00 2023-06-10

高伯新下季唔玩應該是明智選擇，因為今季好大機會成績唔達標，未來前景也不樂觀。目前及格的指標太過苛刻了，五班頭馬竟只計兩場，最抵死是低班馬愈來愈多，同時編排五班賽大大增加，變相減少了下游馬房爭分機會。
第二場第四班一○○○米草地：「龍城強將」細細隻不似短途馬，所以第三仗已扳上千四，前仗更增程一哩，但上仗大幅度縮程，是此駒第一次跑一千直路賽，表現卻出奇地好。
頭六戰全敗的「龍城強將」，次次走勢差強人意，就算跑第五名一次，也輸五個半馬位毫無威脅。上仗「龍城強將」備受冷落，然而臨場卻見啡格重飛搏殺，票數方面有啟示下果然有計，以往跑中距離毫無前速之馬，該仗短途居然跟到前並力拼到底，證明路程啱跑，也顯示除去頭罩及鼻箍，變為改戴眼罩威力強勁。搵啱配備搵啱路程，加上之前累積減分已多，今次「龍城強將」絕對值得再追，今戰對手又不太突出，可予看好。
第六場第四班一二○○米草地：「龍之心」初出排十二檔並不理想，幸好順利切入二疊跟前，有前有後拼獲第四，更吸引步速唔慢，形勢不利。接戰氣管有血演出走樣，大前仗唞了一個月復出，並且改戴交叉鼻箍變得專注，補中贏馬輕勝，跑出一分九秒二九，更比當日另一組四班頭馬「攻頂」快了七秒。
前仗「龍之心」被捧到大熱，均速大步只拼獲季軍，到了上仗再次失準，得出啟示是不能頻密上陣。既然「龍之心」唞夠有威力，今次唞一個月而臨，再看最近谷閘勝出令人信心大增，更重要今戰對手實力一般，季內贏過的只得「電子兄弟」，甚至上仗躋身三甲之馬竟然欠奉，形勢大好。