Cally - 旺角首個最大型萬聖節街頭派對集合街頭文化＋音樂＋打卡＋地道美食 | 商界講呢啲

更新時間：02:00 2026-10-29 HKT
發佈時間：02:00 2026-10-29 HKT

今年好多區都有「香港萬聖月」派對，但最精彩又熱鬧嘅一定係「旺角有落！朗豪坊萬聖節街頭派對」，朗豪坊將於本周六（10月31日）喺商場對出嘅砵蘭街舉辦旺角區首個最大型萬聖節街頭派對，派對揉合街頭文化、現場音樂、變裝打卡同地道美食，仲請咗國際潮玩藝術家DANSIN整咗架港式紅VAN「旺角妖巴」，同一系列取材自旺角日常嘅Q版原創港式妖怪畀大家打卡。除咗匯聚世界級Coser、香港霹靂舞代表同本地人氣樂隊表演，有地道小食、攤位遊戲、免費派發萬聖節特別版富豪雪糕等！Cally仲收到風今次係朗豪坊近20年來首次舉辦嘅大型戶外狂歡活動，令人相當期待！

除咗戶外派對，4樓通天廣場懸浮咗一個7米巨型《MARS》火星裝置，屬於英國知名藝術家Luke Jerram世界巡展作品嘅香港首展「Walk me to Mars」重點展品，火星下仲有「TRICK or BEANS」零重力氣泡咖啡節（10月31日至11月1日舉行），入面集合14個本地獨立咖啡同特色餐飲品牌，甚至請到Tokyo Indie Coffee Fes日本品牌參與。

著數方面，朗豪坊聯乘咗場內超過40間人氣餐飲、美妝及潮流服飾品牌，推出節日優惠同埋Trick or Treat互動體驗，合共送出超過50,000份節日驚喜。

Cally問過朗豪坊，佢哋覺得而家嘅消費者，尤其年輕顧客及旅客，除咗購物之外，仲好重視活動帶來嘅體驗同氛圍，期望透過「盛事＋旅遊」嘅聯乘效應，豐富區內消費場景，提升訪客到訪意欲同逗留時間，為場內商戶帶來實質經濟效益之餘，亦將人流及消費動力延伸至旺角周邊商戶。

Cally