胡慧沖 - 酒店安排最細房點知開門嚇一跳！ | 筆泰沖動

更新時間：02:00 2026-10-23 HKT
發佈時間：02:00 2026-10-23 HKT

　　去澳門住酒店，大家可能試過五、六星級，但今次入住嘅THE 13 PALACE（澳門十三皇宮），真係令我大開眼界！

　　酒店方面安排我入住佢哋最細嘅房間，我心諗：「最細咪最細囉，反正一個人瞓，要咁大做乜？」點知一開門嚇我一跳！

　　原來佢哋所謂嘅「最細」，竟然都有2,000呎！我差啲以為酒店搞錯咗，安排我入住皇宮！喺香港，2,000呎已經係豪宅級數，喺呢度竟然只係入門級房間！

　　位於澳門路環嘅十三皇宮，前身係「十三酒店」，曾經係澳門最具話題超豪酒店之一，經歷易手、翻新之後，今年6月以全新面貌重新試業。酒店有199間別墅式套房，最細嘅「伯爵第」已經有2,000呎，一房一廳，空間極寬敞。最頂級嘅「太子殿」更達到驚人嘅10,000呎，設有三間睡房、私人泳池及多種休閒設施，簡直係一座私人豪宅！

　　裝潢仲誇張，由著名設計師Peter Marino操刀，採用歐洲巴洛克式宮廷設計，大理石地板、水晶吊燈、華麗雕花、天鵝絨睡床，連浴室都充滿宮廷氣派。行入去，真係有種忽然變咗歐洲貴族嘅錯覺！最特別係每間套房都有專屬電梯直達，私隱度相當高，加上管家式服務，完全係非一般住宿體驗。

　　值得一提係十三皇宮屬澳門少數不設賭場嘅豪華酒店，所以如果想享受澳門頂級酒店，又唔鍾意賭場人來人往嘅氣氛，呢度確係幾特別嘅選擇。據報當年整個酒店項目耗資超過十億美元，曾以極盡奢華為賣點。如今重新出發，除咗金碧輝煌嘅宮廷裝潢，亦加入更多休閒養生元素，希望吸引唔同類型旅客。

　　講返自己，今次最難忘始終係嗰間「最細房」！最搞笑係，每晚去完廁所返上床瞓，竟然有種要先經過Lobby至返到去嘅感覺！

胡慧沖