胡慧冲 - 酒店安排最细房点知开门吓一跳！ | 笔泰冲动

更新时间：02:00 2026-10-23 HKT
发布时间：02:00 2026-10-23 HKT

　　去澳门住酒店，大家可能试过五、六星级，但今次入住嘅THE 13 PALACE（澳门十三皇宫），真系令我大开眼界！

　　酒店方面安排我入住佢哋最细嘅房间，我心谂：「最细咪最细啰，反正一个人瞓，要咁大做乜？」点知一开门吓我一跳！

　　原来佢哋所谓嘅「最细」，竟然都有2,000呎！我差啲以为酒店搞错咗，安排我入住皇宫！喺香港，2,000呎已经系豪宅级数，喺呢度竟然只系入门级房间！

　　位于澳门路环嘅十三皇宫，前身系「十三酒店」，曾经系澳门最具话题超豪酒店之一，经历易手、翻新之后，今年6月以全新面貌重新试业。酒店有199间别墅式套房，最细嘅「伯爵第」已经有2,000呎，一房一厅，空间极宽敞。最顶级嘅「太子殿」更达到惊人嘅10,000呎，设有三间睡房、私人泳池及多种休闲设施，简直系一座私人豪宅！

　　装潢仲夸张，由著名设计师Peter Marino操刀，采用欧洲巴洛克式宫廷设计，大理石地板、水晶吊灯、华丽雕花、天鹅绒睡床，连浴室都充满宫廷气派。行入去，真系有种忽然变咗欧洲贵族嘅错觉！最特别系每间套房都有专属电梯直达，私隐度相当高，加上管家式服务，完全系非一般住宿体验。

　　值得一提系十三皇宫属澳门少数不设赌场嘅豪华酒店，所以如果想享受澳门顶级酒店，又唔钟意赌场人来人往嘅气氛，呢度确系几特别嘅选择。据报当年整个酒店项目耗资超过十亿美元，曾以极尽奢华为卖点。如今重新出发，除咗金碧辉煌嘅宫廷装潢，亦加入更多休闲养生元素，希望吸引唔同类型旅客。

　　讲返自己，今次最难忘始终系𠮶间「最细房」！最搞笑系，每晚去完厕所返上床瞓，竟然有种要先经过Lobby至返到去嘅感觉！

胡慧冲