KellyChu - 大型原創舞劇《李小龍：香港傳奇》明年9、10月上演港芭進駐西九演藝中心型格升級 | Executive日記

更新時間：02:00 2026-10-09 HKT
發佈時間：02:00 2026-10-09 HKT

　　Kelly好鍾意睇芭蕾舞，香港芭蕾舞團近年創作好多精彩嘅舞碼，推高咗芭蕾藝術水平，仲把香港文化特色融入多套經典芭蕾舞劇，大受內地同國際舞迷歡迎。港芭演藝水平已去到一個新高度，仲迎來好消息，就係成為首個進駐西九演藝中心嘅舞蹈藝團，真係舞迷嘅喜訊，可以喺全新又先進嘅演藝中心觀賞非常優雅嘅芭蕾舞。

　　西九文化管理局昨天同港芭簽署合作備忘錄，港芭將於2027年4月進駐全新嘅西九演藝中心，成為本港首個以駐團形式進駐表演藝術場地的舞蹈藝團。雙方將會圍繞藝術創作、人才培育、觀眾拓展同國際交流等範疇展開長遠合作，共同推動本港表演藝術邁向國際。

　　西九管理局行政總裁馮程淑儀喺簽署儀式致辭時話，港芭係首個與西九建立深度合作的本地藝團，別具意義。雙方將推動芭蕾藝術普及化同產業化。除咗劇場演出外，亦會善用西九多個室內同室外空間，舉辦公眾演出、教育推廣、社區參與項目及跨界別合作，並拓展銀髮芭蕾，讓不同年齡同背景嘅民眾都能接觸芭蕾舞，融入社區。

　　作為西九演藝中心駐場藝團，港芭話，將定期於中心呈獻其旗艦節目同多元藝術活動。喺中心明年開幕的一年內，港芭將呈獻約十個星期嘅演出，當中包括已於早前公布、喺明年9月至10月期間上演嘅大型原創舞劇《李小龍：香港傳奇》世界首演，作為中心開幕重點節目之一。

　　其後《李小龍：香港傳奇》會展開國際巡演，足跡將遍及亞洲、中東、歐洲、澳洲同北美洲等地，彰顯西九演藝中心作為推動大型香港原創作品走向本地及國際舞台嘅重要平台角色。港芭又預計，進駐西九演藝中心後，每年將吸引更多本地觀眾同訪港旅客走進劇場，欣賞世界級的芭蕾藝術。

KellyChu