KellyChu - 中亞中歐高加索藝團首來門票今日開賣香港藝術節來年逾190場表演大陣仗 | Executive日記

更新時間：02:00 2026-10-07 HKT
發佈時間：02:00 2026-10-07 HKT

　　香港藝術節載譽歸來，公布第55屆藝術節精彩節目！2027年2月至3月，藝術節將會匯聚近1500位本地及海外藝術家，帶嚟約45套節目、逾190場演出，以及約300項加料節目、外展及教育活動，陣容華麗之餘，節目亦超出想像！今屆仲多咗中亞、中歐及高加索地區嘅藝團來港獻藝，配合國家「一帶一路」嘅發展方向。

　　開幕及閉幕節目好有睇頭。開幕演出將於2月18日舉行，由蕭邦國際鋼琴大賽冠軍劉曉禹，聯同世界頂尖樂團蒙特利爾交響樂團演出拉赫曼尼諾夫第二鋼琴協奏曲，透過跌宕旋律，展現作品嘅情感張力。去到3月19日閉幕，就由阿斯塔納國家歌劇院芭蕾舞團演出俄式芭蕾《斯巴達卡斯》，展現史詩級震撼。除此之外，英國大提琴家史蒂芬．伊瑟利斯、荷蘭鋼琴家拉爾夫．范拉特等大師帶嚟精彩演繹，絕對不容錯過。

　　今屆藝術節將帶嚟一系列創新作品，藝術版圖亦進一步擴闊至中亞、中歐及高加索地區。鍾意劇場嘅Kelly，心水就一定係來自格魯吉亞嘅加比奧澤木偶劇場。呢個充滿童話色彩嘅劇場將首度訪港，帶嚟2個故事作品，透過精巧木偶將獨特嘅舞台世界呈現觀眾眼前，風格罕見。

　　至於《阿Q正傳》同樣特別。80年代經德國劇作家海因改編魯迅原著，今次藝術節同德國西波美拉尼亞劇院合作改編，由香港演員以粵語演出，成為世界首演新作。咁多好節目，實有你心水！門票今日上午10時正式開售，等到頸都長嘅Kelly已經準備好撲飛！

KellyChu