KellyChu - 內地「女俠」仗義散盡萬元補貼走訪麥當勞隨機請客傳溫情 | Executive日記

更新時間：02:00 2026-09-29 HKT
發佈時間：02:00 2026-09-29 HKT

　　有位內地女生近日來港旅遊，喺支付平台幸運抽中「香港麥當勞萬元補貼」，但有效期只得一周，佢翌日就要返內地，真係「蘇州過後無艇搭」。由於補貼只可用10次、單次最高1000元，所以佢決定化身「香港麥當勞俠」，隨機請陌生人食麥當勞。呢個善舉喺網上引發熱議，唔少本港網民讚佢「人美心善」、「實力詮釋了獨樂樂不如眾樂樂」，Kelly都忍唔住要畀個like！

　　呢位女仔以網名「香港麥當勞俠」喺小紅書分享經歷，指自己9月26日抽中補貼後，因不想浪費，決定「做點瘋狂且好玩的事情」。佢分2日走訪灣仔、中環、尖沙咀等多間分店請客，並將部分餐點送畀長者、小童、清潔工及警察等人。佢坦言，自己性格內向，喺店門外主動邀請陌生人並唔容易，又怕同一分店店員太辛苦，所以轉咗唔同分店。

　　佢仲話，首晚見到網民讚揚嘅評論後，興奮到失眠，甚至因擔心安排不周而胃痛。佢感謝網民支持，形容係「回憶起來永遠都會覺得頂級幸福和驕傲的一件事」，希望日後再有幸運可與人分享。

KellyChu