胡慧沖 - 買月餅搞到好複雜？ | 筆泰沖動

更新時間：02:00 2026-09-04 HKT
發佈時間：02:00 2026-09-04 HKT

　　香港人食月餅，講到底都係一份過節儀式感。每逢中秋前一兩個月，酒樓、酒店、餅店甚至超市通街都有月餅賣，選擇多到眼花繚亂。偏偏近年就出現一件幾反智嘅事：有啲所謂「限定月餅」要先上網畀錢預訂，之後仲要指定日子、指定地點自己去攞。

　　問題係，月餅唔係平嘢。你畀幾百蚊買一盒，但究竟由甚麼人製造？喺邊度整？製作環境同衞生情況如何？有冇完善品質監控？好多時消費者根本無從得知。既然今日市面上咁多有品牌、有門市、有信譽嘅選擇，點解仲要先畀錢，再山長水遠去攞一盒來歷未必清楚嘅月餅呢？

　　其實要食有特色嘅月餅，選擇多的是。好似泰國著名中菜廳「文苑」推出嘅月餅，由傳統蓮蓉、五仁，到近年大熱嘅榴槤口味都有，製作認真，包裝亦有水準，在泰國每年幾乎都搶購一空。幸好今年香港某泰國品牌超市亦已經有售，仲有迷你裝，想試味又唔使一次買太多。

　　我自己試過，質素確實靠得住。中秋買月餅，其實最重要係食得開心兼食得安心。鍾意就買，睇啱邊款就拎，何必要先畀晒錢，再約時間去領取？今時今日買盒月餅，真係唔需要搞到好似攞演唱會飛咁複雜。

胡慧沖