胡慧冲 - 买月饼搞到好复杂？ | 笔泰冲动

更新时间：02:00 2026-09-04 HKT
发布时间：02:00 2026-09-04 HKT

　　香港人食月饼，讲到底都系一份过节仪式感。每逢中秋前一两个月，酒楼、酒店、饼店甚至超市通街都有月饼卖，选择多到眼花缭乱。偏偏近年就出现一件几反智嘅事：有啲所谓「限定月饼」要先上网畀钱预订，之后仲要指定日子、指定地点自己去攞。

　　问题系，月饼唔系平嘢。你畀几百蚊买一盒，但究竟由甚么人制造？喺边度整？制作环境同衞生情况如何？有冇完善品质监控？好多时消费者根本无从得知。既然今日市面上咁多有品牌、有门市、有信誉嘅选择，点解仲要先畀钱，再山长水远去攞一盒来历未必清楚嘅月饼呢？

　　其实要食有特色嘅月饼，选择多的是。好似泰国著名中菜厅「文苑」推出嘅月饼，由传统莲蓉、五仁，到近年大热嘅榴梿口味都有，制作认真，包装亦有水准，在泰国每年几乎都抢购一空。幸好今年香港某泰国品牌超市亦已经有售，仲有迷你装，想试味又唔使一次买太多。

　　我自己试过，质素确实靠得住。中秋买月饼，其实最重要系食得开心兼食得安心。钟意就买，睇啱边款就拎，何必要先畀晒钱，再约时间去领取？今时今日买盒月饼，真系唔需要搞到好似攞演唱会飞咁复杂。

胡慧冲