KellyChu - 推無界與大眾劇場 守護港文化根脈 「毛Sir」毛俊輝成立劇藝慈善基金 | Executive日記
更新時間：02:00 2026-09-04 HKT
發佈時間：02:00 2026-09-04 HKT
發佈時間：02:00 2026-09-04 HKT
字體大小
投身戲劇界超過半世紀嘅「毛Sir」毛俊輝，秉持「融匯中西、推陳出新」嘅理念，為觀眾持續帶嚟高質作品。經過一年幾時間嘅籌備，「毛俊輝劇藝慈善基金會」正式成立，並獲認可為註冊慈善機構。基金會將推動劇藝傳承、人才培育、藝術創新同兩地文化交流，以「雙軌並行」模式發展，推出支持創作嘅「無界劇場」，以及推廣藝術普及嘅「大眾劇場」。
毛Sir多年來深耕戲劇創作、教學同研究，曾任香港話劇團公司化後首任藝術總監、香港演藝學院戲曲學院創院院長，係業界重要推手。作為基金會創會主席，毛Sir喺發布會致辭時表示，正因業界同儕以及社會各界嘅支持鼓勵，推動佢成立呢個突破傳統慈善框架、專注劇藝發展嘅慈善基金會，強調基金會「係屬於大家嘅」，希望凝聚各方力量，守護香港文化根脈。
佢話，基金會未來會透過劇藝研究創作同「人才孵化計劃」，培育新一代人才，創作兼具本土特色、國際視野及香港文化身份嘅舞台作品，並聯繫海內外跨界合作夥伴，探索劇藝創作嘅新技巧同新模式，搭建香港劇藝研究創作同傳承嘅橋樑。
基金會將會「雙軌並行」發展，當中「無界劇場」會向上突破，支援專業人才發展同跨界創作；「大眾劇場」就會向橫發展，讓更多市民接觸劇藝，回饋社會。
文體旅局副局長劉震、深圳市文化廣電旅遊體育局副局長丁中元及香港演藝學院校長陳頌瑛亦出席發布會；基金會邀請多名藝術界人士組成顧問團。
Kelly相信，基金會未來將為香港劇藝開展新篇章！
KellyChu
最Hit
