KellyChu - 羅淑佩大讚：締造「只在香港」回憶 昂坪360夜航啟動 光影重現80年代 | Executive日記
更新時間：02:00 2026-07-25 HKT
發佈時間：02:00 2026-07-25 HKT
發佈時間：02:00 2026-07-25 HKT
字體大小
呢個夏天未諗到有咩節目？不妨同親朋好友去搭纜車睇日落，認真難忘。為慶祝成立20周年，昂坪360昨晚舉行「昂坪360二十周年纜車夜航」首航典禮，為暑假限定嘅夜航體驗揭開序幕。全線108架纜車喺夜幕下穿梭山海，昂坪市集更變身成80年代懷舊霓虹燈大道，仲有特別亮燈嘅天壇大佛！文體旅局局長羅淑佩致辭時，大讚活動別出心裁，以光影致敬香港歲月風華，充分展現「文化+旅遊」嘅融合魅力，締造「只在香港」嘅體驗，讓旅客可同時感受大嶼山美景與人文情懷嘅深度融合。
昂坪360主席黃琨暐就話，昂坪360 20年來，持續推陳出新，不斷帶來嶄新難忘體驗，累計接待超過2600萬名賓客，呢啲數字背後嘅無數笑臉與故事，正係昂坪360 20年來最珍貴嘅片段。另外，昂坪360董事總經理董沛銓、文體旅局常任秘書長沈鳳君、香港旅遊業議會副主席謝淦廷、旅發局總幹事劉鎮漢、旅監局行政總裁楊霸活、港鐵公司行政總裁楊美珍、港鐵公司企業事務及品牌總監蔡少綿、藝人佘詩曼等，都有出席首航典禮。
亮燈儀式後，昂坪市集大道化身懷舊霓虹燈主題大道，LED招牌重現昔日老香港街道風貌，退役纜車車廂亦結合彩燈裝置，成為打卡熱點。天壇大佛更喺夜航晚上特別亮燈，現場仲有「叱咤903星空下音樂會」，氣氛熱烈。
賓客可於黃昏乘纜車欣賞日落，入夜後回程俯瞰機場與港珠澳大橋夜景，浪漫滿分。夜航成人來回票價200元、小童及長者半價。即日至8月16日，仲有7晚提供夜航體驗，尾班車往昂坪為晚上9時，往東涌為晚上9時半。市集食肆延長營業時間之餘，仲有優惠提供。昂坪360更推出即抽即獎活動，大派總值超過港幣200萬嘅禮品，包括雙人來回機票及電子產品。
KellyChu
昂坪市集大道化身為懷舊霓虹燈主題大道，重現昔日老街道風貌。
大家即日起可搭纜車睇日落及夜景。
