結婚擺酒掀禮金爭奪戰 女家人情女家袋？ 男家算死草企圖獨吞 網民搬出家規列公平分莊準則｜Juicy叮
發佈時間：13:00 2026-11-06 HKT
結婚利益引爆人情爭奪戰。有準新娘指與母親商討酒席安排，女家體貼自費部分酒席並要求收回女家親戚人情以便日後回禮；豈料準新郎自恃包辦婚禮，堅持全場通吃。帖文引發網民怒轟男方算死草，搬出傳統婚嫁規矩教路，更有過來人直言婚前計到盡，婚後只會「離硬婚」。詳情見下圖及下文：
結婚擺酒掀禮金爭奪戰 女家人情女家袋？ 男家算死草企圖獨吞 網民搬出家規列公平分莊準則逐張睇↓↓↓↓
準新郎自恃全包企圖獨吞
樓主今天（6日）在 Threads 發帖求助人情分配。她透露，與母親商討酒席時提出折衷方案：「男家包幾圍酒席，其餘酒席女家自費，但女家人情女家袋晒」。因女家親戚人情是日後回禮之用：「如果今次表姨封1萬人情畀我，將來表姨嫁女我阿媽都要回1萬畀佢。所以女家親戚嘅人情係女家袋返」。
豈料安排遭男友拒絕。男友堅持全場通吃，理據是：「婚禮錢全部都係佢出，所有人情都係男朋友袋返」。
有網民質疑女家自出酒席錢，男方仍想全收實在離譜：「女家出酒席錢你男朋友都想收，定係點？無理由咁離譜啩？你不如講清楚啲先，婚禮全部係佢出，『婚禮』係點定義㗎？」樓主回應指男友原本想全包酒席並袋晒人情，母親好心減輕負擔才提出包部分酒席，女家人情女家袋，結果雙方各持己見陷入僵局。
網民搬出傳統家規列分莊法
網民一面倒痛斥男方算死草、吃相難看。有人怒斥男方貪小便宜：「好心你男朋友咪咁核突啦，女家出自己嗰邊酒席都要畀你男朋友袋？」有人直指男方將結婚當生意：「擺嚟諗住賺錢？咁計較就唔好結啦！」熟悉習俗的網民也力撐女家：「阿媽做法先正常，正常係男家出錢多數會包埋女家酒席，之後收到人情，女家嘅人由女家袋晒」。
為解決爭議，網民整理出兩套公平分莊準則：
•酒席分賬，人情各自歸家：雙方既然分賬負責各自酒席，女家親戚人情歸父母，男家歸男家，朋友則歸新人。
•新郎全收，男方需全包開支：若新郎堅持獨吞人情，全場酒席、禮金、金器及所有婚禮雜費必須由男方全包，女家毋須出任何錢。
網民分享分帳實例
除了傳統家規，過來人也大方分享自家圓滿的四分天下方程式，指當年結婚時：「男家畀晒所有使費酒席，男家人情就畀返老爺奶奶（6299），女家就畀返我父母，自己朋友（friend）就歸我哋。金器就畀晒我哋。」
也有人提議既然爭拗，不如直接「全部人情收晒之後揀幾個團體捐咗佢」，一了百了。
不過也有網民分析，爭奪人情背後可能是經濟出問題：「老實講。錢去邊個都無所謂。畀晒岳母也無問題。問題婚後你哋點過活？如果男方借錢填酒席婚宴，佢之後要還錢，佢無錢食飯，你過意得去。量力而為求生活。如果大家都無錢就四四六六拆掂佢。如果女家有錢就唔好計較。」
未過門計到盡 網民勸退：離硬婚
男方錙銖必較的態度引發網民勸退潮。有網民深感憂慮：「而家結婚就計邊個岀錢，邊個收錢⋯⋯咁嚟緊樓主你要有心理準備，結婚後嘅家庭支出」，直言婚後生活更難捱。
過來人指出：「結婚開心事都咁大分歧，以後結咗婚更多瑣碎嘢嘈。如果生埋仔你未婚夫都咁計較，真係有排你喊。」
不少人奉勸樓主看清枕邊人：「你條仔同佢屋企唔識嘢就問下人問下親戚，睇得出你嫁到入去佢哋只會更計較，執生啦！」
網民直言男方連數千至一萬元的人情都要算計，婚前計到盡，婚後只會出現更多矛盾，兩邊都這麼計較的話，不如「其實兩邊都咁計較錢嘅一係就唔好擺酒……就咁簽紙影張大合照就算！」
資料來源：mmary_wonggg＠Threads
相關閱讀：
3萬蚊龍鳳鈪送完要「保管」被拒 奇葩奶奶狠咒阿仔「橫屍街頭」 網民震驚：親生定執返嚟？
準新娘曬「細龍鳳鈪」讚奶奶出手大方：「佢環保袋當手袋，對我已經好捨得」Sales當場拋一句話掀議
偏心母屈錢資助兩弟結婚 各捐$10萬大元 月入$3萬單身港女氣炸 狠心做一事反擊
