港人搭小巴阻止阿婆打尖被指「唔識尊老愛幼」 30字嬲爆反擊獲網民撐：做得好！
發佈時間：14:51 2026-09-22 HKT
本港專線小巴座位有限，排隊上車向來是約定俗成的禮儀。然而，近日有港人分享早前排隊等候小巴時，期間遇到兩名長者企圖「打尖」插隊，眼見排在隊頭的乘客未有阻止，因此決定挺身而出維持秩序，惟兩名長者被揭發後僅拋出一句「而家啲後生唔識尊老愛幼」，隨即讓事主嬲爆反駁，帖文公開後獲大批網民支持，高呼：「大快人心」！
港人等小巴遇兩婆婆企圖打尖 出聲阻止反遭控「唔識尊老愛幼」
事主在社交平台發文，坦言「其實真係唔想鬧班老人家，因為自己屋企都有，自己遲早都係」，但日前排隊等小巴的經歷確實令他忍無可忍。事主指，當日與家中長輩排隊等候前往瑪麗醫院的63號專線小巴（綠色小巴），並守規矩地排在隊伍的第三及第四位。當小巴駛近至車站時，排在事主身後的兩名長者正在閒聊，其中「婆婆A」詢問「婆婆B」是否去華富邨買餸，婆婆B回應「係呀有優惠呀嘛」。當小巴一埋站，兩名長者竟當場繞過排在最前的一對年輕男女，企圖無視隊伍直接上車，惟當時最前方的男女卻選擇默不作聲。
事主見狀立刻挺身而出維持秩序，向那對男女及兩名婆婆揚言：「佢哋唔出聲係佢哋嘅事，排隊識唔識？你兩個上車啦仲望？」待該對男女上車後，事主目測車廂「得返兩個位」，剛好夠自己與家人登車。此時，該兩名婆婆竟要求事主：「比（俾）我哋上先啦」，更拋出一句：「而家啲後生唔識尊老愛幼㗎啦」。對此，事主隨即嬲爆反駁：「尊老愛幼係比啲知個醜字點寫嘅人，買餸就唔好搭兩蚊車阻住人去醫院！」
網民共鳴：擺明喺度搏大霧！
帖文公開後，隨即引起不少市民共鳴，紛紛留言大讚事主罵得痛快，有自稱同為60歲以上、受惠「兩蚊兩折」優惠的網民直言「Well done，我都係2蚊車」、「我本身都係兩蚊搭車，但係我都好X憎啲老嘢，老X奉要讓佢！」。
同時，有不少網民分享以往等候小巴遇上的類似經歷，「小巴一埋站個呀嬋即刻由隊尾衝上嚟爭上車……俾人一齊X柒佢，呀婆即刻扮晒可鄰：『唉呀唔知你哋排緊隊呀嘛』，擺明喺度搏大霧！」、「有次等巴士我帶住呀仔排頭位，有個呀婆應該計啱晒時間，巴士啱啱埋站佢就到咗，由最尾行上輪椅位 ……上咗車得番兩個關愛座我同仔仔坐咗，佢仲特登叫我起身讓比（俾）佢坐。我冇比錢搭車？我緊係有需要先坐啦」；亦有網民分享曾遇過拿柺杖的婦人稱可以「優先上車」，「我喺個欄排第一，有個阿嬋唔排隊，企隊頭，我話『排隊喺後面……』個阿嬋好大聲話『我哋呢啲係優先㗎，唔使排隊，個個司機都知。』」認為不應以行動不便作為特權。
來源：Threads
文：LW
同場加映：IKEA出大絕！「絕情膠牌」擋梳化防客齋坐打躉 網民激撐：一早要啦，啲人自己玩爛規矩
